តារាសម្ដែងប្រុស Vincent Chiao ដែលជាតារាប្រុសជើងចាស់និយមសម្ដែងរឿងភាគបុរាណចិនល្បីៗ ជាពិសេសជាតួអង្គ ទេវរអឺឡាង ក្នុងរឿង «ចង្កៀងផ្កាឈូកទិព្វ» តែងតែឆក់យកបេះដូងមហាជនជាមួយនឹងទេពកោសល្យសម្ដែងដ៏ប៉ិនប្រសប់ និង រូបរាងដ៏ស្រស់សង្ហារបស់លោក។ មួយរយៈធំមកនេះ លោក Vincent Chiao គឺហាក់បាត់មុខពីពិភពសិល្បៈ ដែលជាហេតុធ្វើឱ្យមហាជននិយមទស្សនារឿងដែលលោកសម្ដែងជាច្រើនចង់ដឹងពីសុខទុក្ខជីវិតរស់នៅបច្ចុប្បន្នរបស់លោកជាខ្លាំង។
តាមព័ត៌មានបានឱ្យដឹងថា បច្ចុប្បន្ន តារាសម្ដែងប្រុស Vincent Chiao គឺមិនសូវសកម្មលើវិស័យសិល្បៈដូចមុននោះឡើយ ដោយលោកស្នាក់នៅតែផ្ទះមើលថែទាំម្ដាយចាស់ជរា និង ចូលចិត្តថតរូបពីធម្មជាតិជុំវិញខ្លួន។ លោកបានហៅខ្លួនឯងថា «បុរសមេផ្ទះដ៏អស្ចារ្យ» ដោយជារៀងរាល់ថ្ងៃ លោកតែងកំដរកម្ដាយចាស់អាយុ ៩៤ ឆ្នាំ បោសសម្អាតផ្ទះសម្បែង បោកគក់ខោអាវ ចម្អិនម្ហូប និង នាំម្ដាយចេញទៅក្រៅដើរលំហែជាដើម។ លោកបានរៀនធ្វើម្ហូបជាច្រើនដែលស័ក្ដិសមសម្រាប់តម្រូវមនុស្សចាស់ ហើយជាញឹកញាប់តែងតុបតែងម្ហូបឱ្យមើលទៅស្រស់ស្អាតទាក់ទាញមិនស៊ាំភ្នែកទៀតផង។ លោក Vincent បានហៅសកម្មភាពប្រចាំថ្ងៃនេះដែរ ជាពេលវេលាដ៏ស្ងប់សុខ និង សន្តិភាពបំផុតសម្រាប់លោក។
បន្ថែមពីនេះ តារាប្រុសវ័យ ៥៧ ឆ្នាំរូបនេះ ក៏បានចំណាយពេលជាច្រើនលើការថតរូបដែលជាចំណង់ចំណូលចិត្តរបស់លោកផងដែរ។ ជាញឹកញាប់ លោកតែងថតរូបម្ដាយ និង ទេសភាពធម្មជាតិដ៏ស្រស់ស្អាតជុំវិញខ្លួន។ ចំណង់ចំណូលចិត្ត បូករួមនឹងការស្រឡាញ់ធម្មជាតិផងនោះ លោក Vincent អាចអង្គុយរាប់ម៉ោងមិនធុញទ្រាន់ដើម្បីតែចង់ផ្តិតយករូបភាពសត្វស្លាប ឬសត្វល្មូនដែលលោកចូលចិត្ត។
គួរបញ្ជាក់ថា តារាសម្ដែងប្រុស Vincent Chiao បច្ចុប្បន្នមិនគិតគូររឿងស្នេហាអ្វីទៀតឡើយ ចាប់តាំងពីលែងលះជាមួយភរិយាទី ២ កាលពីឆ្នាំ ២០២០ កន្លងទៅនោះ។ លោកបានរៀបការលើកដំបូងក្នុងឆ្នាំ ១៩៩៤ ដោយទទួលបានចំណងដៃកូនៗចំនួន ២ នាក់ និង ប្រកាសលែងលះគ្នាក្នុងឆ្នាំ ២០០៥។ លោកបានព្យាយាមរក្សាឯកជនភាពរបស់លោក ដោយកម្រនឹងនិយាយពាក់ព័ន្ធនឹងអតីតប្រពន្ធទាំង ២ រូបណាស់ ព្រោះមិនចង់ឱ្យមានការប៉ះពាល់ដល់ជីវិតរស់នៅរបស់ពួកគេទាំង ២៕
