ក្រុមហ៊ុនបច្ចេកវិទ្យាមួយនៅក្រុង Shenzhen ប្រទេសចិន បានធ្វើឱ្យមហាជនជាច្រើនផ្ទុះការចាប់អារម្មណ៍ជាខ្លាំង ក្រោយប្រកាសឱ្យ bonus ជាប្រាក់ដល់ទៅ ១ លានយ័ន (ជាង ១៤ ម៉ឺនដុល្លារ) ដល់បុគ្គលិកណាដែលអាចសម្រកគីឡូដោយជោគជ័យ។
ជុំវិញការប្រកាសនេះដែរ ក៏មានបុគ្គលិកម្នាក់ទទួលបានរង្វាន់ 2 ម៉ឺនយ័នរួចដែរ ក្រោយសម្រកបាន ១៨ គីឡូក្រាម ក្នុងរយៈពេលត្រឹមតែ ៣ ខែ ដោយការហាត់ប្រាណ ១ ម៉ោងកន្លះជាប្រចាំ បូករួមនឹងការតមចំណីអាហារផងដែរ។
Insta360 ឬហៅថា Arashi Vision Inc. បានប្រកាសបញ្ចេញ challenge ប្រចាំឆ្នាំ «Million Yuan Weight Loss Challenge» កាលពីថ្ងៃទី ១២ ខែសីហា ឆ្នាំ ២០២៥ កន្លងទៅ ក្នុងបំណងដើម្បីផ្សព្វផ្សាយការរស់នៅជីវិតប្រកបដោយសុខភាពល្អ តាមរយៈការធ្វើលំហាត់ប្រាណ និង មានរបបអាហារត្រឹមត្រូវ។ សម្រាប់បុគ្គលិកដែលចុះឈ្មោះលេង challenge នេះ អ្នកដែលអាចសម្រកគីឡូបានរាល់ ០.៥ គីឡូក្រាម នឹងទទួលបានប្រាក់រង្វាន់ ៥០០ យ័ន។
គួរបញ្ជាក់ដែរថា គិតតាំងពីឆ្នាំ ២០២២ មក ក្រុមហ៊ុនខាងលើបានរៀបចំ challenge មួយនេះ ៧ ដងហើយ គិតជាសាច់ប្រាក់រង្វាន់ដែលផ្ដល់ឱ្យបុគ្គលិកគឺជិត ២ លានយ័នហើយដែរ។ ជាក់ស្ដែង ត្រឹមតែមួយឆ្នាំទៅមិញ សរុបបុគ្គលិក ៩៩ នាក់បានសម្រកគីឡូអស់ ៩៥០ គីឡូក្រាម ដោយរង្វាន់ចែកឱ្យពួកគេម្នាក់ៗសរុបអស់ ១ លានយ័ន។
យ៉ាងណាមិញ challenge នេះដែរ ក៏មកជាមួយនឹងការពិន័យដូចគ្នា ប្រសិនបើបុគ្គលិកណាឡើងគីឡូវិញ នោះនឹងត្រូវសងប្រាក់ ៨០០ យ័ន រាល់ការឡើងម្ដង ០.៥ គីឡូក្រាម ប៉ុន្តែមកទល់បច្ចុប្បន្ននេះ មិនទាន់មាននរណាម្នាក់ត្រូវបានពិន័យនោះឡើយ៕
