ក្នុងនាមជាកូនស្រីមហាសេដ្ឋីពិភពលោកម្នាក់ Vivian Wilson អាយុ ២១ ឆ្នាំ រាល់ថ្ងៃនៅខ្វល់ខ្វាយរឿងអាហារហូបចុក បង់ថ្លៃឈ្នួលផ្ទះ និង រកវិធីរស់នៅជីវិតធម្មតាដូចជនសាមញ្ញទូទៅ ខណៈទំនាក់ទំនងនាង ជាមួយ Elon Musk ជាឪពុក គឺកាន់តែតានតឹងទៅ។
នៅយប់មួយកាលពីចុងឆ្នាំ ២០២៤ ក្នុងភោជនីយដ្ឋានលក់គ្រឿងសមុទ្រតូចមួយនៅ California នាង Vivian បានជ្រួញចិញ្ចើមដាក់ចានអយស្ទ័រនៅពីមុខនាង រួចនិយាយថា៖ «ក្លិនវាដូចទឹកអំបិល ហើយញ៉ាំវារបៀបមិចទៅ?»។ នាងក្រេបស្រាក្រឡុកមួយចឹបរួចទម្លាយថា នាងខានបានញ៉ាំអាហារថ្លៃបែបនេះយូរណាស់មកហើយ។ ការទម្លាយរបស់ Vivian នេះដែរ បានបង្ហាញឱ្យឃើញច្បាស់ពីខ្សែជីវិតជាកូនមហាសេដ្ឋីរបស់នាង ខុសពីអ្វីដែលមនុស្សគ្រប់គ្នានឹកភ្នកស្រមៃឃើញ។ ឪពុកម្ដាយរបស់នាងបានលែងលះគ្នា តាំងពីនាងអាយុ ៤ ឆ្នាំ។ នាងបានចូលរៀនៅសាលា Mirman នៅ Bel Air ដោយក្រោយមកក៏ផ្លាស់ទៅ Ad Astra ដែលជាសាលាឪពុកនាងបង្កើតឡើងសម្រាប់ក្មេងៗ និង បុគ្គលិករបស់ SpaceX។ នៅសាលានោះគឺគ្មានលំដាប់ថ្នាក់ឡើយ ដោយផ្ដោតសំខាន់តែលើផ្នែកវិទ្យាសាស្ត្រ និង បច្ចេកវិទ្យា។
ឡើងដល់ថ្នាក់វិទ្យាល័យ Vivian បានផ្លាស់ទៅរៀននៅ Crossroads នៅ Santa Monica ដែលទីនោះនាងបានសិក្សាជាមួយកូនៗតារាលំដាប់ A ជាច្រើន តែនាងបាននិយាយថា៖ «ខ្ញុំអត់ល្បីផង ហើយខ្ញុំក៏អត់ទៅនិយាយរកពីណានោះដែរ»។ កើនវ័យបាន ១៦ ឆ្នាំ Vivian រកឃើញខ្លួនឯងថាជា transgender ហើយមួយឆ្នាំក្រោយមកទៀត នាងក៏បានដាក់ពាក្យទៅតុលាការដើម្បីប្ដូរឈ្មោះ និង ភេទរបស់ខ្លួន ដោយនាងដាក់ត្រកូលម្ដាយជំនួសត្រកូលឪពុកវិញ។ ក្នុងពាក្យដែលដាក់ស្នើទៅតុលាការ Vivian បានសរសេរថា នាងចង់ផ្ដាច់ការទាក់ទងគ្រប់យ៉ាងជាមួយឪពុកបង្កើតរបស់នាង។
Vivian ទទូចថា នាងគ្មានបានកេរ្តិ៍មរតកអ្វីនោះឡើយ ដោយរៀបរាប់ថា៖ «ខ្ញុំគ្មានលុយរាប់រយរាប់ពាន់ដុល្លារត្រូវចំណាយឡើយ។ ខ្ញុំមានលុយសមល្មមគ្រប់គ្រាន់សម្រាប់តែការហូបចុក ថ្លៃកន្លែងស្នាក់នៅ និង ចំណូលតិចតួចប៉ុណ្ណោះ»។
គួរឱ្យដឹងថា បច្ចុប្បន្ន Vivian រស់នៅជាមួយមិត្តភក្តិ រ៉ាប់រងលុយកាក់ចំណាយចាយវាយដោយខ្លួនឯង ដោយពេលខ្លះក៏បារម្ភខ្លាចរកមិនព្រមបង់ថ្លៃសាលាផង ថ្លៃជួលផ្ទះផង និង ដ្លៃចំណាយប្រចាំថ្ងៃផង។ ទោះជាយ៉ាងណា Vivian គឺមិនដែលមានចិត្តលោភលន់ ខ្វល់ខ្វាយរឿងទ្រព្យសម្បត្តិឡើយ។ នាងបានពោលពាក្យដ៏ចាក់ដោតថា៖ «ខ្ញុំមិនដែលមានបំណងចង់ក្លាយជាអ្នកមានឡើយ។ ខ្ញុំគ្រាន់តែចង់មានជីវិតនឹងនរ និង រស់នៅយ៉ាងសាមញ្ញធម្មតាប៉ុណ្ណោះ»៕
ប្រភព៖ VN Express
