ម្យ៉ាងដែរ! បុរសម្នាក់ច្នៃឡានតូចជាងគេបំផុតលើលោក ទំហំត្រឹម ៥០ សង់ទីម៉ែត្រ ល្មមជិះតែម្នាក់ឯង

បុរសសញ្ជាតិអ៊ីតាលីម្នាក់ឈ្មោះ Andrea Marazzi បានកើតគំនិតកែច្នៃឡាន 1993 Fiat Panda ទៅជាឡានដែលមានទំហំតូចចង្អៀតជាងគេបំផុតលើពិភពលោក ដោយលទ្ធផលចេញមកប្លែកគួរឱ្យទាក់ទាញ។

ឡានមួយគ្រឿងនោះមានមុខងារពេញលេញដូចឡានទូទៅធម្មតា គ្រាន់តែទំហំគឺខុសប្លែកខ្លាំងពីឡានទូទៅ និង អាចជិះបានសម្រាប់មនុស្សតែម្នាក់ប៉ុណ្ណោះ។ ឡាននេះមានទំហំប្រមាណជា ៥០ សង់ទីម៉ែត្រ កម្ពស់ ១៤៥ សង់ទីម៉ែត្រ ប្រវែង ៣៤០ សង់ទីម៉ែត្រ និង ទម្ងន់ ២៦៤ គីឡូក្រាម។

តាមព័ត៌មានបានឱ្យដឹងថា លោក Marazzi ច្នៃឡាននេះឡើងដោយចាយពេលប្រមាណ ១២ ខែ ប្រើប្រាស់គ្រឿងបន្លាស់ ៩៩% ពីប្រភពដើមរបស់ឡាន Panda។ ឡាននេះដែរ ដំណើរការដោយអគ្គិសនី សាកថ្មម្ដងអាចបើកបានចម្ងាយ ២៥ គីឡូម៉ែត្រ និង ល្បឿនអាចបើកលឿនបំផុតត្រឹម ១៥ គីឡូម៉ែត្រក្នុងមួយម៉ោង។

បច្ចុប្បន្ន លោក Marazzi និង ក្រុមការងាររបស់លោកកំពុងរៀបចំឯកសារដើម្បីដាក់ឡាន Panda មួយគ្រឿងនេះទៅ Guinness World Record ឱ្យទទួលស្គាល់ជាឡានដែលតូចចង្អៀតជាងគេបំផុតលើពិភពលោក៕