អ្នកវិទ្យាសាស្ត្រអាមេរិក និង ចិន បានចាប់ដៃគ្នាបង្កើតវិធីសាស្ត្រថ្មីមួយធ្វើតែមួយជំហានប៉ុណ្ណោះ អាចបំប្លែងកាកសំណល់ប្លាស្ទិកទៅជាប្រេងសាំងបាន រីឯប្រសិទ្ធភាពវិញទទួលបានខ្ពស់រហូតដល់ជាង ៩៥%។
កាលពីថ្ងៃទី ២៧ ខែសីហា ឆ្នាំ ២០២៥ កន្លងទៅ វិបសាយ Interesting Engineering បានចេញផ្សាយអត្ថបទមួយនិយាយពីអ្នកវិទ្យាសាស្ត្រនៅសហរដ្ឋអាមេរិក និង នៅប្រទេសចិន បានសហការគ្នាក្នុងការបង្កើតវិធីសាស្ត្រមួយជំហាន (one-step method) ក្នុងការកែប្រែកាកសំណល់ប្លាស្ទិកទៅជាប្រេងសាំងក្នុងបន្ទប់សីតុណ្ហភាព ជាមួយនឹងប្រសិទ្ធភាពទទួលបានជាង ៩៥%។
បើធៀបទៅនឹងវិធីសាស្ត្របុរាណ ដំណើរការថ្មីនេះគឺទាមទារឧបករណ៍តិចជាងមុន ថាមពលតិចជាងមុន និង ងាយស្រួលជាងមុន ហើយថែមទាំងអាចពង្រីកដល់វិស័យឧស្សាហកម្មទៀតផង។ ចុងបញ្ចប់នៃដំណើរការបំប្លែង សមាសធាតុចម្បងដែលទទួលបានគឺសាំង ឬប្រេង, សារធាតុគីមី និង អាស៊ីត hydrochloric ពោលគឺមានន័យថា ផលិតផលសម្រេចចុងក្រោយគឺអាចយកទៅប្រើប្រាស់សម្រាប់ការផលិតទឹកស្អាត, ការផលិតលោហៈ, ផ្នែកឱសថ,ចំណីអាហារ ឬខាងឧស្សាហកម្មប្រេងសាំង។
ចំពោះដំណើរការផលិត ដើម្បីបំប្លែងកាកសំណល់ប្លាស្ទិកមិនរលួយឱ្យទៅជាប្រេងសាំងដែលមានគុណភាពខ្ពស់ក្នុងសីតុណ្ហភាព និង សម្ពាធដោយប្រើវិធីសាស្ត្រជំហានតែមួយ ខាងក្រុមអ្នកវិទ្យាសាស្ត្របានរួមបញ្ចូលគ្នារវាងកាកសំណល់ប្លាស្ទិកជាមួយ isoalkane ស្រាល ដែលជាប្រភេទអ៊ីដ្រូកាបូន ឬសមាសធាតុសរីរាង្គដែលអាចប្រើប្រាស់ក្នុងដំណើរការចម្រាញ់ប្រេង។
ដំណើររបស់ពួកគេផលិតអ៊ីដ្រូកាបូន ដែលភាគច្រើនជាម៉ូលេគុលកាបូនពី ៦-១២ ដែលជាសមាសធាតុសំខាន់របស់ប្រេងសាំង។ លទ្ធផលនៃអាស៊ីត hydrochloric គឺអាចបន្សាបបានដោយសុវត្ថិភាព និង ប្រើប្រាស់ឡើងវិញជាវត្ថុធាតុដើមនៅក្នុងឧស្សាហកម្មទំនើបជាច្រើន។
ប្រសិទ្ធភាពការបំប្លែងនៅសីតុណ្ហភាព ៣០ អង្សាសេ សម្រាប់បំពង់ PVC ទន់មាន ៩៥% ឬ ៩៩% សម្រាប់បំពង់ PVC រឹង ឬខ្សែ PVC។ អ្នកស្រាវជ្រាវក៏បានតេស្តលើការបំប្លែងនៃការបញ្ចូលគ្នារវាងសារធាតុ PVC និង កាកសំណល់ polyolefin ហើយក៏រកឃើញប្រសិទ្ធភាពបាន ៩៦% នៅសីតុណ្ហភាព ៨០ អង្សាសេ៕
