ស្ថិតនៅលើព្រៃភ្នំពណ៌ខៀវស្រងាត់នារដ្ឋ Cross River ភាគអាគ្នេយ៍ប្រទេសនីហ្សេរីយ៉ា ភូមិ Ubang គឺជាភូមិមួយដែលល្បីល្បាញរឿងវប្បធម៌ភាសាដ៏ប្លែកទាក់ទាញខុសពីបណ្ដាភូមិស្រុកនានាលើពិភពលោក ដោយនៅទីនោះ មនុស្សប្រុស និង មនុស្សស្រីធំធាត់ឡើងជាមួយនឹងការប្រើប្រាស់ពាក្យពេចន៍ ២ ភាសាផ្សេងពីគ្នា។
ជាក់ស្ដែង ចំពោះមនុស្សពេញវ័យ បើទោះជាភាសាខុសគ្នាប៉ុន្តែពួកគេនៅតែស្ដាប់គ្នាយល់។ ឧទាហរណ៍ មនុស្សស្រីហៅសំពត់ថា «kaket» តែមនុស្សប្រុសហៅថា «nki», ស្បែកជើង សម្រាប់មនុស្សស្រីហៅថា «abuo» តែប្រុសៗវិញហៅថា «okpok»។ ក្នុងភូមិ Ubang ភាសាប្រើប្រាស់គឺមិនមែនសម្រាប់តែទំនាក់ទំនងគ្នាតែមួយមុខនោះទេ ប៉ុន្តែវាក៏ជាការបែងចែកយ៉ាងច្បាស់ពីភេទនៅក្នុងវប្បធម៌ក្នុងតំបន់ផងដែរ។
ពលរដ្ឋរស់នៅក្នុងភូមិនោះជឿថា មនុស្សស្រីគឺមកពីភពសុក្រ ឯមនុស្សប្រុសគឺមកពីភពអង្គារ ដូច្នេះហើយទើបពួកគេមានការប្រើប្រាស់ភាសាខុសគ្នាបែបនេះ។ យ៉ាងណាមិញ មកទល់ពេលនេះគឺមិនមាននរណាម្នាក់ដឹងច្បាស់ឡើយថាទំនៀមទម្លាប់នៃការប្រើប្រាស់ភាសា ២ ផ្សេងគ្នារវាងមនុស្សប្រុស និង មនុស្សស្រីក្នុងភូមិ Ubang នេះកកើតឡើងតាំងពីពេលណា ឬមូលហេតុអ្វីបានជាតម្រូវឱ្យប្រើប្រាស់បែបនេះ។
តាមការស្រាវជ្រាវមួយចំនួនបានលើកឡើងផ្សេងគ្នាជុំវិញដើមកំណើតនៃការបែងចែកភាសាតាមភេទក្នុងភូមិមួយនេះ ដោយសម្មតិកម្មឃើញទូទៅជាងគេគឺលើកឡើងថាពាក់ព័ន្ធនឹងកត្តាជំនឿសាសនា។ ពលរដ្ឋក្នុងភូមិ Ubang ជឿថាព្រះបង្កើត Adam និង Eves ឡើងជាមនុស្សដំបូងក្នុងភូមិនេះ និង ឱ្យពួកគេនិយាយភាសា ២ ផ្សេងគ្នា។ ដើមឡើយ ព្រះមានបំណងចង់ឱ្យមនុស្សម្នាក់ៗលើពិភពលោកមានភាសា ២ ផ្សេងគ្នា ប៉ុន្តែដោយគិតថាចំនួនភាសាគឺមិនគ្រប់គ្រាន់ក្នុងការបែងចែកឱ្យស្មើគ្នា ទើបនេះជាអំណោយដ៏ពិសេសមួយផ្ដល់ឱ្យតែភូមិ Ubang ប៉ុណ្ណោះ ធ្វើឱ្យភូមិនេះមានភាពកម្រទាក់ទាញខុសពីសហគមន៍ដទៃផ្សេងទៀតលើពិភពលោក។
ងាកមកបរិបទនៃសកលភាវូបនីយកម្ម មនុស្សជាច្រើនគឺបារម្ភថាវប្បធម៌ ២ ភាសានៃភូមិ Ubang គឺមានហានិភ័យនឹងបាត់បង់ទៅជារៀងរហូត ខណៈយុវវ័យក្មេងៗក្នុងសហគមន៍គឺមានការកើនឡើងក្នុងការប្រើប្រាស់ភាសាលាយឡំនឹងភាសាអង់គ្លេសក្នុងការនិយាយគ្នាប្រចាំថ្ងៃ។ ដើម្បីរក្សាតម្លៃនៃការប្រើប្រាស់ភាសាដ៏ទាក់ទាញនេះ គ្រូបង្រៀនជាច្រើននៅ Ubang បានអំពាវនាវឱ្យដាក់ចេញនូវដំណោះស្រាយជាច្រើនដូចជាការបោះពុម្ពសៀវភៅនៅ Ubang រួមទាំងមានចេញជាប្រលោមលោក និង ខ្សែភាពយន្តជាដើម៕
ប្រភព៖ Kenh14
