មុននេះបន្តិច មានគ្រោះរញ្ជួយដីកម្រិត ៧.៧ រ៉ិចទ័រមួយបានវាយប្រហារភាគកណ្ដាលប្រទេសមីយ៉ាន់ម៉ា បង្កឱ្យអគារជាច្រើនរញ្ជួយផ្អៀងដួលរលំ រួមទាំងប៉ះពាល់ដល់បណ្ដាប្រទេសជិតខាងមួយចំនួនទៀតដូចជាប្រទេសថៃជាដើម។
តាមទិន្នន័យពីខាង USGS បានឱ្យដឹងថា គ្រោះរញ្ជួយដីនេះបានកើតឡើងនៅរយៈចម្ងាយ ១៦ គីឡូម៉ែត្រភាគពាយព្យក្រុង Sagaing ភាគកណ្ដាលប្រទេសមីយ៉ាន់ម៉ា ក្នុងជម្រៅ ១០ គីឡូម៉ែត្រនាវេលាម៉ោង ១២ និង ៥០ នាទីថ្ងៃត្រង់ ថ្ងៃទី ២៨ ខែមីនា ឆ្នាំ ២០២៥ នេះ។ តាមការផ្ដល់ព័ត៌មានពីភ្នាក់ងារ AFP នាទីក្រុង Naypyidaw បានបញ្ជាក់ថា ដងផ្លូវជាច្រើនបានរងការខូចខាត ខណៈអគារមួយចំនួនទៀតបានផ្អៀងដួលរលំ។
ចំពោះករណីមានអ្នករបួសស្លាប់ ឬទំហំនៃការខូចខាតខ្លាំងប៉ុនណា ខាងរដ្ឋាភិបាលយោធាមីយ៉ាន់ម៉ានៅមិនទាន់បានទម្លាយបញ្ជាក់ឱ្យដឹងនៅឡើយទេ។
ក្រៅពីប្រទេសមីយ៉ាន់ម៉ា ខាងភ្នាក់ងារ CENC នៅចិនក៏បានឱ្យដឹងដែរថា គ្រោះរញ្ជួយដីកម្រិត ៧.៩ រ៉ិចទ័របានវាយប្រហារក្នុងប្រទេស ដោយពលរដ្ឋក្នុងខេត្ត Yunnan រងការរញ្ជួយដូចគ្នា។ ជាមួយគ្នានោះ នៅក្រុងបាងកក ប្រទេសថៃ ពលរដ្ឋរាប់រយនាក់បាននាំគ្នារត់ជម្លៀសចេញពីអគារ ផ្លូវរថភ្លើងជាច្រើនក៏ត្រូវបានផ្អាកដំណើរការជាបណ្ដោះអាសន្ន ក្រោយគ្រោះរញ្ជួយដីវាយប្រហាររង្គើញ័រពេញទាំងក្រុង ៕
