រឿងជំងឺកំពុងដោះស្រាយ ឥលូវក្រុងបាងកក ប្រទេសថៃ ប្រឈមនឹងគ្រោះទឹកជំនន់ ខណៈទឹកទន្លេចៅប្រាយ៉ាហក់ឡើងខ្លាំង

នៅថ្ងៃទី ៣០ ខែឧសភា ឆ្នាំ ២០២៥ នេះ សារព័ត៌មានថៃ Bangkok Post បានចេញផ្សាយថា ទីក្រុងបាងកក កំពុងស្ថិតក្រោមការតាមដាន និង ប្រុងប្រយ័ត្នខ្ពស់ពីការកើតមានគ្រោះទឹកជំនន់ ខណៈកម្រិតទឹកសមុទ្រហក់ឡើងខ្ពស់គំរាមកំហែងដល់តំបន់ទំនាបនៅតាមបណ្ដោយទន្លេចៅប្រាយ៉ា។

រដ្ឋបាលក្រុងបាងកក កំពុងសម្របសម្រួលជាមួយនឹងខាងនាយកដ្ឋានធារាសាស្ត្រ នាយកដ្ឋានជលសាស្ត្រ កងទ័ពជើងទឹកថៃ ក៏ដូចជាទីភ្នាក់ងារដទៃផ្សេងទៀត ដើម្បីពិនិត្យតាមដានស្ថានការណ៍យ៉ាងជិតដិត និង ដាក់ចេញការប្រកាសអាសន្នប្រសិនបើដល់ពេលវេលាចាំបាច់ នេះបើតាមការលើកឡើងពីប្រធាននាយកដ្ឋានលូ និង ប្រព័ន្ធលូប្រចាំប្រទេសថៃ Jessada Chandraprabha។

កម្រិតទឹកហក់ឡើងខ្ពស់ បូករួមនឹងការជ្រៀតចូលនៃទឹកប្រៃចូលក្នុងទន្លេចៅប្រាយ៉ា បានជំរុញឱ្យបានការត្រួតពិនិត្យជញ្ជាំងការពារទឹកជំនន់ និង ហេដ្ឋារចនាសម្ព័ន្ធលូនានាជាប្រចាំនៅតាមទន្លេចៅប្រាយ៉ា ក៏ដូចជាតាមប្រឡាយតភ្ជាប់មួយចំនួនដូចជា ប្រឡាយ Khlong Bangkok Noi, Khlong Mahasawt និង Khlong Phrakhanong ផងដែរ។

ជាមួយគ្នានោះដែរ ខាងនាយកដ្ឋានឧតុនិយមប្រចាំប្រទេសថៃ ក៏បានចេញការព្រមានពីស្ថានភាពភ្លៀងធ្លាក់ខ្លាំងដែលនឹងបន្តកើតមានឡើងនៅភាគខាងជើងចាប់ពីថ្ងៃនេះ ដោយសារតែការឆ្លងកាត់នៃខ្យល់មូសុងដែលបង្កើនឱ្យមានហានិភ័យនៃគ្រោះទឹកជំនន់ និង ការរអិលបាក់ដី។ យ៉ាងណាមិញ ខាងនាយកដ្ឋានបានបញ្ជាក់ដែរថា ភ្លៀងធ្លាក់អាចនឹងថមថយទៅវិញចាប់ពីថ្ងៃស្អែករហូតដល់ថ្ងៃពុធសប្ដាហ៍ក្រោយ ប៉ុន្តែនៅតាមតំបន់ខ្លះក៏អាចនៅមានភ្លៀងធ្លាក់ខ្លាំងដដែល៕

ប្រភព៖ Bangkok Post