ភូមិមួយនៅចិនជួបគ្រោះរអិលបាក់ដី ផ្ដាច់ភូមិចេញជាពីរក្នុងពេលត្រឹមប៉ុន្មានវិនាទី ឯមនុស្សកំពុងបាត់ខ្លួនច្រើននាក់

កាលពីថ្ងៃទី ០៨ ខែកុម្ភៈ ឆ្នាំ ២០២៥ កន្លងទៅ វេលាម៉ោង ១១ និង ៥០ នាទីព្រឹក (ពេលវេលាក្នុងតំបន់) មានករណីគ្រោះរអិលបាក់ដីដ៏ខ្លាំងក្លាមួយបានកើតមានឡើងភ្លាមៗទៅលើភូមិ Jinping ក្នុងតំបន់ Tuanlian ក្រុង Yubin ខេត្ត Sichuan ប្រទេសចិន ដែលបណ្ដាលឱ្យមនុស្សចំនួន ២៩ នាក់កំពុងបាត់ខ្លួន (ចំនួនពិតប្រាកដនៅមិនទាន់ចេញផ្លូវការឡើយ) នេះបើតាមខាងអាជ្ញាធរក្រុង Yubin ប្រកាសក្នុងសន្និសីទកាសែត កាលពីវេលាម៉ោង ១២ រំលងអធ្រាត្រឈានចូលថ្ងៃទី ០៩ ខែកុម្ភៈ ឆ្នាំ ២០២៥។

តាមព័ត៌មានទទួលបានពីខាងអាជ្ញាធរអំឡុងពេលធ្វើសន្និសីទកាសែតបានឱ្យដឹងថា ផ្ទះសម្បែងពលរដ្ឋចំនួន ១០ ខ្នង រួមទាំងរោងចក្រមួយត្រូវបានដីរអិលបាក់គ្របដណ្ដប់ពីលើ មនុស្សចំនួន ២ នាក់បានរងរបួសត្រូវបានសង្គ្រោះដោយជោគជ័យ ខណៈប្រមាណ ២៩ នាក់ផ្សេងទៀតត្រូវបានរាយការណ៍ថាកំពុងបាត់ខ្លួន។

នៅយប់ថ្ងៃទី ០៨ ខែកុម្ភៈ ដដែលនោះ ខាងកងកម្លាំងសង្គ្រោះមកពីគ្រប់ផ្នែក និង ក្រុមគ្រូពេទ្យ បាននាំគ្នាសហការគ្នាយ៉ាងសស្រាក់សស្រាំចុះទៅដល់ទីតាំងដើម្បីសង្គ្រោះជនរងគ្រោះដែលកំពុងបាត់ខ្លួន។ នៅទីតាំងនោះ អ្នកភូមិជាច្រើនបាននាំគ្នាអង្គុយមិនព្រមចាកចេញទៅណា ដោយខ្លះព្យាយាមកាយដីស្វែងរកសាច់ញាតិដែលកំពុងកប់ជាប់ក្រោមដី។

តាមសម្ដីអ្នកភូមិបានលើកឡើងថា គ្រោះរអិលបាក់ដីនេះវាយប្រហារមកភ្លាមៗជាមួយសំឡេងសន្ធឹកដូចគ្រោះរញ្ជួយដី។ មនុស្សម្នាព្យាយាមរត់ចេញពីផ្ទះដែរ តែខ្លះរត់ចេញមិនទាន់នោះឡើយ។ អ្នកភូមិបានឱ្យដឹងទៀតថា ដោយសារតែតំបន់នោះមានភ្លៀងធ្លាក់ប៉ុន្មានថ្ងៃជាប់គ្នាទើបបង្កឱ្យមានការរអិលបាក់ដីបែបនេះ តាមវីដេអូអ្នកភូមិថតបានបង្ហាញឱ្យឃើញថា ភូមិត្រូវដីបាក់ហូរកាត់ផ្ដាច់ចេញជាពីរផ្នែក ម្ខាងកើតម្ខាងលិចត្រឹមពេលតែ ៥៨ វិនាទី មើលទៅគួរឱ្យតក់ស្លុតបំផុត៕

ប្រភព៖ Kenh14