អ្នករត់តាក់ស៊ីអាយុ ៦៤ ឆ្នាំម្នាក់ រត់ទៅទប់ឡានកំពុងរអិលថយក្រោយ បែរអកុសលជួបរឿងអាក្រក់រហូតត្រូវអ-ស់បុណ្យ

គ្រោះថ្នាក់ដ៏អកុសលមួយបានកើតឡើងលើបុរសវ័យ ៦៤ ឆ្នាំម្នាក់នៅតៃវ៉ាន់នាពេលថ្មីៗនេះ ដោយសារតែព្យាយាមទៅជួយទប់ឡានតាក់ស៊ីរបស់ខ្លួនកំពុងរអិលថយក្រោយ។

តាមសារព័ត៌មាន EBC News គ្រោះថ្នាក់អកុសលនេះដែរបានកើតមានឡើងនៅតំបន់ Pingtung កោះតៃវ៉ាន់ វេលាម៉ោងប្រមាណជា ៧ យប់ ថ្ងៃទី ២៥ ខែសីហា ឆ្នាំ ២០២៥ កន្លងទៅ។ នៅពេលកើតហេតុ ជនរងគ្រោះជាអ្នកបើកឡានមានត្រកូល Wang បានចតឡានរបស់គាត់នៅមុខហាងមួយដោយមិនពន្លត់ម៉ាស៊ីនឡើយ ទើបបណ្ដាលឱ្យឡានរបស់គាត់ចាប់ផ្ដើមរអិលថយក្រោយ។

ដោយការភ័យស្លន់ចង់ទប់ឡាន លោក Wang ក៏បានរត់ទៅក្រោយឡានព្យាយាមទប់ តែបែរជាភ្លាត់ដួលទៅលើផ្លូវស្របពេលឡានរអិលមកកិនពីលើ។ ក្រោយមក អ្នកដំណើរយាមផ្លូវ ក៏ដូចជាក្រុមអ្នកពន្លត់អគ្គិភ័យបាននាំគ្នាជួយលើកឡានទាញជនរងគ្រោះចេញ និង ដឹកទៅសង្គ្រោះនៅមន្ទីរពេទ្យភ្លាមៗ តែជាអកុសលលោកត្រូវបានគ្រូពេទ្យប្រកាសថាបានស្លាប់បាត់ទៅហើយ។

តាមរបាយការណ៍បឋមទទួលបានពីខាងអាជ្ញាធរ បានបញ្ជាក់ថា មូលហេតុឡានរអិលថយក្រោយនេះគឺដោយសារតែអ្នកបើកមិនបានទាញហ្វ្រាំងដៃ៕