ក្រសួងវប្បធម៌ លេងធម៌ក្ដៅលើម្ចាស់ហ្វេសប៊ុកមួយ ក្រោយបង្ហោះបទ «ក្ដឹងរួយ» បង្កើតដោយ AI មានខ្លឹមសារប៉ះពាល់ខ្លាំងតម្លៃស្ត្រីខ្មែរ

ថ្មីៗនេះ មានទំព័រហ្វេសប៊ុកមួយឈ្មោះថា All from me ដែលបានធ្វើការបង្ហោះនូវបទចម្រៀងមួយបទមានចំណងជើងថា «ក្ដឹងរួយ» ដោយវីដេអូបទចម្រៀងនេះដែរទទួលរងនូវប្រតិកម្មពីមហាជនអ្នកលេងបណ្ដាញសង្គមជាច្រើនរហូតខាងម្ចាស់ផេកធ្វើការលុបចោលវិញ។

យ៉ាងណាមិញ ដោយពិនិត្យឃើញថាបទចម្រៀងមួយបទនេះមានប្រើប្រាស់ខ្លឹមសារគ្រោតគ្រាត អសុរោះ គ្មានសីលធម៌ ប៉ះពាល់ខ្លាំងដល់វប្បធម៌ប្រពៃណី ទំនៀមទម្លាប់ សេចក្ដីថ្លៃថ្នូរក៏ដូចជាតម្លៃរបស់ស្ត្រីខ្មែរ ខាងក្រសួងវប្បធម៌ និងវិចិត្រសិល្បៈក៏បានចេញសេចក្ដីប្រកាសអំពាវនាវដល់អាជ្ញាធរមានសមត្ថកិច្ចឱ្យចាត់វិធានការរកអត្តសញ្ញាណម្ចាស់ផេកខាងលើមកទទួលខុសត្រូវចំពោះទង្វើរបស់ខ្លួន បើទោះជាវីដេអូបទចម្រៀងមួយបទនោះត្រូវលុបចេញហើយក៏ដោយ។

តាមសេចក្ដីប្រកាសរបស់ក្រសួងបានរៀបរាប់ថា៖ «ក្រសួងវប្បធម៌ និងវិចិត្រសិល្បៈ សូមជូនដំណឹងដល់សាធារណជនបានជ្រាបថា ក្រសួងបានពិនិត្យឃើញ ទំព័រហ្វេសប៊ុកមួយ ឈ្មោះ ALL from me បានធ្វើការបង្ហោះផ្សព្វផ្សាយបទចម្រៀងក្រោមចំណងជើងថា ក្តឹងរួយ ដែលមានខ្លឹមសារគ្រោតគ្រាត អសុរោះ គ្មានសីលធម៌ ប៉ះពាល់យ៉ាងខ្លាំងដល់វប្បធម៌ប្រពៃណី ទំនៀមទំលាប់ សេចក្តីថ្លៃថ្នូរសង្គម និងតម្លៃស្រ្តីខ្មែរ។ បើទោះបីជាបទចម្រៀងដែលផលិតដោយបច្ចេកវិជ្ជាបញ្ញាសប្បនិម្មិត (AI) នេះ ត្រូវបានលុបចេញពីទំព័រហ្វេសប៊ុកមួយ ឈ្មោះ ALL from me ក្តី តែបុគ្គលដែលជាអុ្នកគ្រប់គ្រងទំព័រហ្វេសប៊ុក ALL from me ត្រូវធ្វើការទទួលខុសត្រូវចំពោះទង្វើរបស់ខ្លួន។ ក្រសួងសូមអំពាវនាវដល់អាជ្ញាធរមានសមត្ថកិច្ច សូមចាត់វិធានការស្វែងរកអត្តសញ្ញាណបុគ្គលរូបនេះ ដើម្បីទទួលខុសត្រូវចំពោះសកម្មភាពនេះ និងស្នើសុំដល់សាធារណជនដែលប្រើប្រាស់បណ្តាញសង្គម សូមកុំបន្តចែកចាយ និងផ្សព្វផ្សាយបទចម្រៀងនេះ។ សូមអរគុណ»៕