អ្នកទេសចរជនជាតិម៉ាឡេស៊ីម្នាក់ បានចែករំលែករឿងរ៉ាវដ៏គួរឱ្យចាប់អារម្មណ៍ និង ភ្ញាក់ផ្អើលមួយអំឡុងពេលធ្វើដំណើរកម្សាន្តទៅកាន់ប្រទេសចិន ដោយរូបលោកបានជួបប្រទះនឹងបន្ទប់ទឹកសាធារណៈដែលបំពាក់ទៅដោយឧបករណ៍ទំនើបខ្លាំងនឹកស្មានមិនដល់។
តាមការបង្ហាញរបស់បុរសជាអ្នកទេសចររូបនោះបានឱ្យដឹងថា លោកបានទៅបន្ទប់ទឹកសាធារណៈមួយហើយពេលដើរដល់ច្រកចូលលោកក៏បានប្រទះឃើញឧបករណ៍ស្កេនមុខមួយនៅច្រកចូលនោះ។ អ្វីដែលទំនើបអស្ចារ្យនោះគឺថា លោកត្រូវស្កេនមុខដើម្បីអាចយកក្រដាសអនាម័យចូលបន្ទប់ទឹកបាន ដោយលោកបញ្ជាក់បន្ថែមថាមនុស្សម្នាក់អាចស្កេនមុខបានតែម្ដងប៉ុណ្ណោះ។
គួរឱ្យដឹងផងដែរថា បច្ចេកវិទ្យាស្កេនមុខយកក្រដាសនៅមុខបន្ទប់ទឹកសាធារណៈនេះបើតាមការស្រាវជ្រាវមិនមែនទើបតែមានថ្មីៗនេះទេ ពោលគឺមានតាំងពីប៉ុន្មានឆ្នាំមុនមកម្ល៉េះ ប៉ុន្តែដោយសារតែអ្នកទេសចរមួយចំនួនមិនធ្លាប់បានទទួលបទពិសោធពីមុនមកទើបបណ្ដាលឱ្យពួកគេភ្ញាក់ផ្អើលចាប់អារម្មណ៍ខ្លាំងបែបនេះ៕
