ជារឿងមួយដែលធ្វើឱ្យអ្នកគាំទ្រជាច្រើនភ្ញាក់ផ្អើល ក្រោយកំពូលតារាចម្រៀងស្រី IU បានទម្លាយអំឡុងពេលចូលរួមកម្មវិធីវិទ្យុមួយរបស់មិត្តសំឡាញ់របស់នាង Yoo In Na ថារូបនាងកើតមានអាការមួយហៅថា «Skeeter Syndrome» ដែលជាប្រតិកម្មអាល់ឡែហ្ស៊ីធ្ងន់ធ្ងរជាមួយមូលខាំ។
ខណៈកំពុងធ្វើការផ្សាយផ្ទាល់ តារាសម្ដែងស្រី Yoo In Na និង ជាម្ចាស់កម្មវិធីផ្ទាល់បានចោទសួរទៅ IU ថា៖ «តើនាងសុខចិត្តឱ្យសំឡេងមូសរំខានរាល់យប់ តែអត់ត្រូវវាខាំ ឬ មិនមានឮសំឡេងមូសទេតែក្រោកឡើងត្រូវវាខាំ នាងជ្រើសរើសមួយណា?»។
ភ្លាមៗ IU ក៏បានប្រតិកម្មឆ្លើយតបវិញថា៖ «ខ្ញុំអត់ចង់បានទាំងពីរជម្រើសហ្នឹង»។ IU បានរៀបរាប់ថា នាងអាឡែហ្ស៊ីជាមួយនឹងមូសខាំគឺធ្ងន់ធ្ងរខ្លាំង ដោយស្នាមខាំរបស់វានឹងធ្វើឱ្យស្បែកនាងឡើងហើមមានស្នាមអុតភ្លាមៗ។ ក្នុងករណីខ្លះទៀត បើធ្ងន់ធ្ងរមែនទែននាងត្រូវប្រើថ្នាំអង់ទីប៊ីយោទិចទើបបាត់។
IU ក៏បានទម្លាយជុំវិញសត្វមូសចូលចិត្តខាំមុខរបស់នាង ដោយនាងនិយាយថាមកទល់ពេលនេះនាងនៅមានស្នាមនៅលើមុខដោយមូសខាំកាលពីក្មេងទៀតផង។ ក្រោយការទម្លាយរបស់ IU ឃើញថាអ្នកគាំទ្ររបស់នាងជាច្រើនមានការភ្ញាក់ផ្អើលជាខ្លាំង ដោយខ្លះបានលាន់មាត់ថាពួកគេមិនដែលដឹងសោះថាមានមនុស្សអាឡែហ្ស៊ីជាមួយមូសខាំ៕
