បុរសវ័យក្មេងម្នាក់ ត្រូវបានតុលាការកាត់ទោសឱ្យជាប់ពន្ធនាគារ ៨ ខែ ក្រោយរកឃើញថារូបគេបានដុតផ្ទះរបស់ខ្លួនឯងដល់ទៅ ២ លើកក្នុងពេល ១ យប់ ព្រោះតែហេតុផលដ៏គួរឱ្យហួសចិត្តបំផុតមួយ។
បើតាមឯកសារដែលបញ្ចេញដោយតុលាការ Newcastle Crown កាលពីយប់ថ្ងៃទី ០៩ ខែកញ្ញា ឆ្នាំ ២០២៣ កន្លងទៅ បានឱ្យដឹងថា បុរសវ័យក្មេងម្នាក់ឈ្មោះ James Brown អាយុ ២៦ ឆ្នាំ ជាអ្នករស់នៅតំបន់ Northumberland ចក្រភពអង់គ្លេស បានទូរស័ព្ទទៅខាងក្រុមពន្លត់អគ្គិភ័យរាយការណ៍ថាមានអគ្គិភ័យឆាបឆេះនៅផ្ទះរបស់ខ្លួន។ ពេលនោះ រូបគេបាននិយាយថាមានភ្លើងឆេះចេញពីម៉ែត្រអគ្គិសនី និង រាលដាលឆេះផ្នែកខាងក្រោមនៃទូរខោអាវរបស់គេ។
ភ្លាមៗ ខាងក្រុមពន្លត់អគ្គិភ័យបានចុះទៅដល់ទីតាំងដោយគ្រប់គ្រងស្ថានការណ៍បានទាំងស្រុង ព្រមទាំងផ្ដាច់ចរន្តអគ្គិសនីក្នុងផ្ទះសិនដើម្បីធានាសុវត្ថិភាព។ យ៉ាងណាមិញ ៩០ នាទីក្រោយមក ពួកគេក៏ទទួលបានការខលចូលពីទីតាំងដដែលដោយលើកនេះភ្លើងឆេះក្នុងសភាពខ្លាំងជាងមុន។ អ្វីដែលចម្លែកបំផុតនោះគឺថា Brown ដែលជាម្ចាស់ផ្ទះគឺមិនមានការភ័យស្លន់ស្លោអ្វីឡើយទាំងដែលផ្ទះរបស់ខ្លួនឯងកំពុងឆេះ តែរូបគេបែរជាស្វាហាប់ទាញទូរស័ព្ទមកថតសកម្មភាពក្រុមពន្លត់អគ្គិភ័យកំពុងបំពេញការងារទៅវិញ។
Brown ត្រូវបានសង្ស័យ និង ស៊ើបអង្កេត ដោយលទ្ធផលរកឃើញថាបុរសវ័យក្មេងរូបនេះបានទូរស័ព្ទទៅខាងនាយកដ្ឋានពន្លត់អគ្គិភ័យដល់ទៅ ៨០ ដងក្នុងរយៈពេល ១២ ខែ។ រូបគេត្រូវបានឃាត់ខ្លួនបញ្ជូនទៅតុលាការ ដោយក្នុងសវនាការថ្មីៗនេះ Brown ព្រមសារភាពថារូបគេគឺជាអ្នកដុតផ្ទះខ្លួនឯង ដោយមូលហេតុនោះគឺព្រោះតែរូបគេចង់ឃើញអ្នកពន្លត់អគ្គិភ័យដែលជាអាយដលខ្លួនមកពន្លត់ភ្លើងដោយផ្ទាល់។
ជាសំណាងល្អ មិនមាននរណាម្នាក់រងរបួស ឬទ្រព្យសម្បត្តិរងការខូចខាតធ្ងន់ធ្ងរ។ Brown ត្រូវបានកាត់ទោសឱ្យជាប់ពន្ធនាគាររយៈពេល ៨ ខែ (ព្យួរទោស) និង បម្រើសេវាកម្មសហគមន៍ចំនួន ១៥០ ម៉ោង ដោយក្នុងនោះក៏មានលក្ខខណ្ឌដែលរូបគេត្រូវចូលរួមការប្រឹក្សាផ្នែកផ្លូវចិត្ត និង ស្ថិតក្រោមការត្រួតពិនិត្យយ៉ាងជិតដិតក្នុងសហគមន៍ផងដែរ៕
