ដល់-ក! អ្នកដំណើរភ័យស្លេកមុខ ក្រោយបុរសម្នាក់ទៅបើកទ្វារអាសន្នលើយន្តហោះ ព្រោះចង់ស្រូបខ្យល់អាកាស

កាលពីវេលាម៉ោងប្រមាណ ៨ និង ៤២ នាទីព្រឹកថ្ងៃទី ១១ ខែឧសភា ឆ្នាំ ២០២៥ (ពេលវេលាក្នុងតំបន់) មានហេតុការណ៍ដ៏ហួសចិត្ត និង ភ័យស្លុតបុកពោះមួយបានកើតឡើងលើយន្តហោះ China Eastern Airlines លេខ MU5828 ដែលបានធ្វើដំណើរហោះចេញពីក្រុង Changsha ទៅកាន់ទីក្រុង Kunming។

ភ្លាមៗ ក្រោយន្តហោះទើបនឹងចុះចតដល់ព្រលានយន្តហោះ Kunming ស្រាប់តែមានអ្នកដំណើរប្រុសម្នាក់ទៅបើកទ្វារអាសន្ន បណ្ដាលឱ្យ slide អាសន្នទម្លាក់ចុះដោយស្វ័យប្រវត្តិ។ ជាសំណាងល្អ ក្រុមបុគ្គលិកលើយន្តហោះបានដោះស្រាយស្ថានការណ៍ដោយរលូនមិនមានការខូចខាតអ្វីកើតឡើងឡើយ។

តាមការរៀបរាប់ពីសាក្សីនៅកន្លែងកើតហេតុបានឱ្យដឹងថា បុរសដែលបង្កហេតុនោះគិតថាភ្លើងសញ្ញាប្រកាសអាសន្នលោតឡើងទើបរូបគេទៅបើកទ្វារអាសន្នដើម្បីស្រូបយកខ្យល់អាកាស។ ក្រោយហេតុការណ៍ប្រមាណ ២០ នាទី អ្នកដំណើរទាំងអស់ក៏ត្រូវវានជម្លៀសចេញពីយន្តហោះដោយសុវត្ថិភាព ហើយបុរសជាជនបង្កក៏ត្រូវបានប៉ូលិសចាប់ខ្លួនយកទៅស៊ើបអង្កេតបន្តផងដែរ៕

ប្រភព៖ Kenh14