ថ្មីៗនេះ មានករណីឃាតកម្មដ៏រន្ធត់មួយបានកើតមានឡើងនៅក្នុងប្រទេសប៉ាគីស្ថាន ដោយតារា TikTok ដ៏ស្រស់សោភាម្នាក់ឈ្មោះ Sana Yousaf ត្រូវបានខ្មាន់កាំភ្លើងបាញ់សម្លាប់នៅផ្ទះរបស់នាង ត្រឹមពេលប៉ុន្មានម៉ោងក្រោយជនរងគ្រោះបង្ហោះវីដេអូប្រារព្ធអបអរថ្ងៃខួបកំណើតគម្រប់អាយុ ១៧ ឆ្នាំ។
តាមការបញ្ជាក់ពីប៉ូលិសបានឱ្យដឹងថា ជនសង្ស័យក្នុងករណីសម្លាប់ Sana Yousaf គឺជាបុរសវ័យ ២២ ឆ្នាំ ដោយបច្ចុប្បន្នត្រូវប៉ូលិសចាប់ឃាត់ខ្លួនបានហើយ។ តាមការរៀបរាប់របស់ប៉ូលិស ជនសង្ស័យខាងលើគឺបានបង្ហាញខ្លួននៅខាងក្រៅផ្ទះរបស់ជនរងគ្រោះរាប់ម៉ោងមុនធ្វើការវាយប្រហារ។ «នេះជាករណីឃាតកម្មដ៏សាហាវ និង ឈាមត្រជាក់បំផុត។ រូបគេព្យាយាមទាក់ទងជនរងគ្រោះជាច្រើនលើកច្រើនសាប៉ុន្តែនាងបដិសេធ» នេះបើតាមសម្ដីមេប៉ូលិសក្រុង Islamabad លោក Syed Ali Nasir Rizvi។
គួរបញ្ជាក់ថា នាង Sana Yousaf គឺជាតារា TikTok ដ៏ល្បីមួយរូបនៅប្រទេសប៉ាគីស្ថាន ដោយនាងមានអ្នកតាមដានលើ TikTok ប្រមាណជាង ៨០ ម៉ឺននាក់ និង តាមបណ្ដាញសង្គមផ្សេងទៀតជាង ១ លាននាក់។ នាងផ្ទុះប្រជាប្រិយភាពជាមួយការផលិតវីដេអូធ្វើត្រាប់សំឡេង ចែករំលែក Tips ថែសម្រស់ និង ផ្សព្វផ្សាយផលិតផលថែរក្សាសម្រស់ជាដើម៕
ប្រភព៖ Kenh14
