រថភ្លើង Gloria tram មួយបានជួបគ្រោះថ្នាក់ធ្លាក់ផ្លូវ រួចបន្តទៅបុកនឹងអគារមួយនៅក្រុង Lisbon ពេញទំហឹង បណ្ដាលឱ្យមនុស្ស ១៥ នាក់ស្លាប់ និង ១៨ នាក់ផ្សេងទៀតរងរបួស។
ហេតុការណ៍គ្រោះថ្នាក់ខាងលើនេះដែរ បានកើតឡើងកាលពីថ្ងៃទី ០៣ ខែកញ្ញា ឆ្នាំ ២០២៥ កន្លងទៅ (ពេលវេលាក្នុងតំបន់)។ តាមការចេញផ្សាយរបស់ទូរទស្សន៍ SIC TV ស្រង់សម្ដីសាក្សីនៅកន្លែងកើតហេតុម្នាក់បានរៀបរាប់ថា រថភ្លើងនោះមានមនុស្សជិះប្រមាណជា ៤០ នាក់ ខណៈបើកចុះភ្នំក៏ធ្លាក់ផ្លូវទៅបុកនឹងអគារមួយយ៉ាងពេញទំហឹងតែម្ដង។
ក្រោយហេតុការណ៍ ជនរងគ្រោះទាំងអស់ត្រូវបានទាញចេញពីបំណែករថភ្លើង ដោយក្នុងនោះជនរងគ្រោះ ១៥ នាក់បានស្លាប់ និង ១៨ នាក់រងរបួស (ក្នុងនោះមានជនបរទេសផងដែរ)។ អត្តសញ្ញាណជនរងគ្រោះទាំងអស់មិនត្រូវបានទម្លាយនោះឡើយ ហើយចំពោះមូលហេតុបង្កជាគ្រោះថ្នាក់នេះ ខាងអាជ្ញាធរកំពុងធ្វើការស៊ើបអង្កេត៕
