បុរសជា DJ ជនជាតិថៃម្នាក់ ត្រូវបានគេប្រទះឃើញសាកសពនៅក្នុងព្រៃនាស្រុក Muang ខេត្ត Kanchanaburi ក្រោយរូបលោកត្រូវបានគេចាប់ខ្លួនយកទៅអស់រយៈពេលប៉ុន្មានថ្ងៃ។ ករណីស្លាប់របស់ DJ រូបនេះដែរ ត្រូវបានគេសង្ស័យថាមានពាក់ព័ន្ធនឹងមិត្តស្រីរបស់បងធំម៉ាហ្វៀម្នាក់។
តាមការចេញផ្សាយរបស់សារព័ត៌មាន Khaosod English បានឱ្យដឹងថា ជនរងគ្រោះ DJ Tatae បានផ្អើលថាបាត់ខ្លួនកាលពីថ្ងៃទី ១៥ ខែឧសភា ឆ្នាំ ២០២៥ កន្លងទៅ ដោយតាមរយៈវីដេអូពីកាមេរ៉ាសុវត្ថិភាពបង្ហាញថា រូបលោកត្រូវបានគេចាប់ខ្លួនទៅនៅព្រឹកថ្ងៃទី ១៤ ខែឧសភា ឆ្នាំ ២០២៥។ នៅអំឡុងពេលនោះ DJ Tatae ទើបតែបញ្ចប់ការងារជាមួយអតិថិជនស្រីម្នាក់នៅក្លឹបមួយកន្លែង ហើយក៏ធ្វើដំណើរតាមផ្លូវទៅជួបស្ត្រីម្នាក់ទៀតឈ្មោះ Nittaya។
ពេលនៅតាមផ្លូវនោះ លោកបានទូរស័ព្ទទៅនាង Nittaya ដោយប្រាប់នាងថាឡានរបស់លោកកំពុងមានគេជិះតាម។ ក្រោយមក ក៏ឮសំឡេង DJ Tatae ឈប់ឡាន ហើយត្រូវគេចាប់អូសចេញពីឡានយកទៅបាត់ទៅ។ គួរឱ្យដឹងថា បើតាមការបញ្ជាក់ពីមិត្តស្រីរបស់ DJ Tatae នាងបាននិយាយថា មុនសង្សារនាងត្រូវគេចាប់ខ្លួន នាងធ្លាប់បានព្រមានលោកដែរកុំឱ្យពាក់ព័ន្ធជាមួយនឹងស្ត្រីម្នាក់ឈ្មោះ Nam។ នាងទទូចឱ្យលោកនៅឱ្យឆ្ងាយពីស្ត្រីរូបនោះព្រោះតែនាងមានពាក់ព័ន្ធនឹងបងធំម៉ាហ្វៀជួញដូរគ្រឿងញៀន ហើយ Tatae ក៏ប្រាប់មកនាងវិញដែរថា រូបលោកឈប់ពាក់ព័ន្ធនឹង Nam ហើយ។
មកដល់ថ្ងៃទី ១៨ ខែឧសភា ឆ្នាំ ២០២៥ សាកសពរបស់ DJ Tatae ក៏ត្រូវបានអ្នកស្រុកប្រទះឃើញនៅក្នុងព្រៃដោយមានស្នាមគ្រាប់កាំភ្លើង ២ គ្រាប់បាញ់ចំថ្ងាស។ តាមការរៀបរាប់ មានអ្នកភូមិម្នាក់បានទៅរកផ្សិតក្នុងព្រៃនៅកន្លែងកើតហេតុនោះ ហើយក៏ប្រទះឃើញជើងរបស់ជនរងគ្រោះលានចេញពីគុម្ពោតព្រៃមក។
ភ្លាមៗដោយការភ័យខ្លាច បុរសរូបនោះក៏បានរត់មកផ្ទះវិញដោយគ្មានផ្ដល់ដំណឹងដល់ប៉ូលិសអ្វីឡើយ ប៉ុន្តែដោយសារតែទិដ្ឋភាពសពរបស់ DJ Tatae ដកជាប់ក្នុងខួរក្បាលពេក លោកក៏បានប្រាប់រឿងនេះទៅសាច់ញាតិខ្លួនឱ្យបានដឹង។ ជីដូនរបស់បុរសជាអ្នកភូមិរូបនោះបានដឹងពីព័ត៌មាន DJ Tatae ត្រូវគេចាប់ ទើបគាត់រាយការណ៍ប្រាប់ប៉ូលិសចុះទៅដល់ទីតាំងប្រទះឃើញសពតែម្ដង។
គួរឱ្យដឹងថា តាមសភាពសពដែលប្រទះឃើញ DJ Tatae ត្រូវបានគេសម្លាប់ចោលក្នុងព្រៃនេះមិនក្រោម ៣ ថ្ងៃនោះទេមុនត្រូវគេប្រទះឃើញ។ បច្ចុប្បន្ន ប៉ូលិសបានធ្វើការឃាត់ខ្លួនបានជនសង្ស័យម្នាក់ហើយ និង កំពុងតែស្វែងរកចាប់ខ្លួនជនសង្ស័យចំនួន ៣ នាក់ផ្សេងទៀត៕
