ថ្មីៗនេះ វីដេអូមួយបានធ្វើឱ្យអ្នកលេងតាមបណ្ដាញសង្គមនៅក្នុងប្រទេសចិនផ្ទុះការខឹងសម្បាដោយវីដេអូនោះបង្ហាញពីបុគ្គលិកការ៉ាស់សាំងម្នាក់នៅតាមផ្លូវរវាងខេត្ត Hubei និង Shaanxi ត្រូវអ្នកបើកឡានទំនើបម្នាក់ធ្វើបាបដោយឱ្យចាក់សាំងរួចក៏បើកឡានគេចទៅបាត់ដោយមិនឱ្យលុយ កាលពីថ្ងៃទី ១២ ខែមីនា ឆ្នាំ ២០២៥ កន្លងទៅ។
តាមកាមេរ៉ាសុវត្ថិភាពបានបង្ហាញឱ្យឃើញ បុរសម្នាក់ជិះឡានទំនើបម៉ាក Porsche តម្លៃ ៧៥០០០ ដុល្លារ (ឡានគ្មានស្លាកលេខ)។ រូបគេបានចូលទៅចាក់សាំងដោយគិតជាប្រាក់ចំនួន ៥០២.២៩ យ័ន (ប្រមាណ ៦៩ ដុល្លារ)។ នៅពេលនោះដែរ បុគ្គលិកស្រីនៅការ៉ាស់សាំងត្រកូល Song ដែលជាបុគ្គលិកតែម្នាក់ធ្វើការនៅថ្ងៃកើតហេតុនោះ នាងបានទៅបើកគម្របចាក់សាំងនៅពីមុខឡានបុរសនោះរួចចាក់សាំងចូលទាំងមិនទាន់បានគិតលុយ រួចក៏ដើរបន្តទៅចាក់ឱ្យឡានមួយផ្សេងទៀតនៅពីក្រោយឡានបុរសនោះ។ យ៉ាងណាមិញ រូបនាងជួបរឿងភ្ញាក់ផ្អើលខ្លាំង ព្រោះតែបុរសជិះឡាន Porsche នោះបានដើរចូលឡានរួចបើកគេចចេញទៅបាត់ដោយមិនបង់លុយថ្លៃសាំងនោះឡើយ ជាហេតុធ្វើឱ្យនាងត្រូវដកលុយខ្លួនឯងមកបង់ជំនួស។
តាមការបញ្ជាក់ពីខាងបុគ្គលិកការ៉ាស់សាំងបានឱ្យដឹងថា ស្ត្រីខាងលើរកចំណូលបានត្រឹម ២៨០០ យ័ន (៤០០ ដុល្លារ) ប៉ុណ្ណោះកាលពីខែមុន ហើយរូបនាងក៏មានកូនស្រី ២ នាក់ត្រូវរ៉ាប់រងទៀត។ យ៉ាងណាមិញ កាលពីថ្ងៃទី ១៤ ខែមីនា ឆ្នាំ ២០២៥ កន្លងទៅ ខាងអ្នកគ្រប់គ្រងការ៉ាស់សាំងបានថ្លែងប្រាប់សារព័ត៌មាន Fengmian News ថា ខាងក្រុមហ៊ុនបានសងលុយទៅលោកស្រី Song វិញរួចរាល់ហើយ។ ចំពោះការបង្ហោះវីដេអូលើបណ្ដាញសង្គមនេះដែរ លោកស្រី Song គ្រាន់តែចង់រកមុខបុរសជិះឡានទំនើបនោះ និង ចង់បញ្ចេញកំហឹងរបស់ខ្លួនឯងដែរ។
៤ ថ្ងៃក្រោយមក ខាងប៉ូលិសក៏រកឃើញបុរសខាងលើនៅខេត្ត Shaanxi ដោយរូបគេព្យាយាមគេចពីការពិន័យដោយធ្វើការសុំទោសទៅប៉ូលិស និង វេរលុយសងទៅឱ្យខាងការ៉ាស់សាំងវិញ ប៉ុន្តែប៉ូលិសនៅតែទទូចឱ្យរូបគេចូលខ្លួនមកកាន់ប៉ុស្ដិ៍ដើម្បីធ្វើការដោះស្រាយបន្តតាមច្បាប់៕
