គភ៌កូនដំបូង ស្វាមីគួរត្រៀមអ្វីខ្លះជាកាដូដល់ភរិយាសំណព្វចិត្ត?

ជាស្វាមី ពេលដឹងឮថាក្លាយជាឪពុកគេ ជាពិសេសកូនដំបូងទៀតនោះ គឺពិតជារំភើបចិត្តជាងភរិយាដែលពពោះទៅទៀត។ នៅពេលពពោះ ស្ត្រីជាភរិយានឹងត្រូវឆ្លងកាត់រឿងជាច្រើន តាំងពីការចាប់ផ្តើមបង្កកំណើតរហូតដល់ថ្ងៃសម្រាល។ ក្នុងនាមជាស្វាមីល្អ ជាស្វាមីពូកែយល់ចិត្ត ចាំបាច់ណាស់គួរតែមានកាដូលើកទឹកចិត្តទៅកាន់ភរិយា។ ការជូនកាដូមិនត្រឹមតែធ្វើឱ្យភរិយាទទួលបានអារម្មណ៍ពិសេសប៉ុណ្ណោះទេ តែថែមទាំងពពោះប្រកបដោយមោទកភាពផងដែរ។ កាដូមានតម្លៃមិនចាំបាច់តែរបស់ថ្លៃៗ ត្រឹមជារបស់ពោរពេញទៅដោយអត្ថន័យ និងទឹកចិត្តក៏គ្រប់គ្រាន់។

១. សៀវភៅសុខភាពស្ត្រីមានផ្ទៃពោះ

ស្ត្រីទើបពពោះកូនដំបូងតែងតែបារម្ភខ្វាយខ្វល់ច្រើន ដូចនេះការអាន ការយល់ដឹងអំពីសុខភាពស្ត្រីមានផ្ទៃពោះ អាចជួយឱ្យស្ត្រីបានត្រៀមខ្លួនរួចជាស្រេចសម្រាប់កូន និង ដឹងពីអ្វីដែលនឹងកើតឡើង។ អ្នកជាស្វាមីត្រូវស្រាវជ្រាវ និង ជ្រើសរើសសៀវភៅណាដែលល្អបំផុត។

២. ខ្នើយ​​ និង សម្លៀកបំពាក់

ការផ្លាស់ប្តូររូបរាងនៅពេលពពោះនឹងធ្វើឱ្យស្ត្រីពិបាក ដេក ដើរ ឈរ អង្គុយ។ ជាកាដូដឹងសុខទុក្ខ អ្នកអាចជូនភរិយានូវសម្លៀកបំពាក់ពោះធំស្អាតៗ និង ខ្នើយសម្រាប់ស្ត្រីពោះធំ។ របស់ទាំងពីរនេះសុទ្ធតែចាំបាច់ ព្រោះ​វានឹងផ្តល់ភាពងាយស្រួលនៅពេលពោះកាន់តែធំ។

៣. នំខេក

ទោះមិនមែនជាថ្ងៃកំណើត តែអ្នកក៏អាចធ្វើឱ្យភរិយារំភើបចិត្ត ដោយជូននំខេកជាការអបអរចំពោះការក្លាយជាអ្នកម្តាយផងដែរ។ ការអបអរគួរតែធ្វើនៅកន្លែងណាមួយដែលរ៉ូមែនទិក ឬបើធ្វើនៅផ្ទះគួរមានសមាជិកគ្រួសារចូលរួមដើម្បីបង្កើនភាពរីករាយ។

៤. បាច់ផ្កា

នារីៗសុទ្ធតែស្រលាញ់ផ្កា អ្នកអាចជ្រើសរើសផ្កាណាដែលភរិយាចូលចិត្ត រួចរៀបចំជាបាច់ជូនទៅកាន់នាង។ ដើម្បីបង្កើតបរិយាកាសឱ្យកាន់តែរំភើប និងរ៉ូមែនទិក អ្នកអាចជូនផ្កានៅកន្លែងមានអនុស្សាវរីយ៍ល្អៗជាមួយគ្នា ឬកន្លែងទទួលទានអាហារពេលល្ងាចក្រោមពន្លឺភ្លើងទៀន។  នៅពេលជូនផ្កាកុំភ្លេចនិយាយពាក្យពេចន៍ផ្អែមល្ហែមផងណា៎។

៥. គ្រឿងលម្អកាយ

ក្រៅពីសម្លៀកបំពាក់ មនុស្សស្រីស្រលាញ់បំផុតគ្រឿងលម្អកាយ។ អ្នកអាចសម្គាល់មើលថាតើគ្រឿងលម្អកាយណាដែលភរិយាធ្លាប់ស្រមៃចង់បាន ឧទាហរណ៍ដូចជា ខ្សែក ចិញ្ចៀន កាបូប ឬស្បែកជើងជាដើម៕