យុវវ័យនៅក្នុងប្រទេសចិននាពេលថ្មីៗនេះ ងាកមករកវិធីសាស្ត្រថ្មីដើម្បីកាត់បន្ថយស្ត្រេសពីរឿងការងារ រឿងលុយកាក់ ឬសម្ពាធសង្គមនានា ដោយការទិញក្បាលដោះយកមកបៀមលេង ព្រោះជឿថាមានប្រសិទ្ធភាព។
តាមប្រព័ន្ធអនឡាញក្នុងប្រទេសចិនឥលូវនេះ គឺផ្ទុះលក់ក្បាលដោះច្នៃសម្រាប់មនុស្សធំដាច់ខ្លាំងមែនទែន ដោយតម្លៃមានចាប់ពីចន្លោះ ១០ ទៅ ៥០០ យ័ន (ជាង ១ ដុល្លារ ដល់ ៦៩ ដុល្លារ)។ ហាងខ្លះនិយាយថា ត្រឹមមួយខែពួកគេលក់បានដល់ជាង ២ ពាន់ក្បាលដោះ ដោយភាគច្រើនអ្នកទិញគឺជាយុវវ័យក្មេងៗ។
អ្នកផលិត និង អ្នកលក់ ក្បាលដោះទាំងនេះ បានផ្សព្វផ្សាយផលិតផលរបស់ខ្លួនថា ជាឧបករណ៍ជួយបន្ថយបញ្ហាថប់បារម្ភ ជួយឱ្យគេងលក់ស្រួល ហើយក៏ជាជំនួយដ៏ល្អសម្រាប់អ្នកចង់ផ្ដាច់បារីផងដែរ។ ដោយឡែក សម្រាប់អ្នកប្រើប្រាស់វិញក៏បានចែករំលែកអ្វីដែលពួកគេទទួលបានក្រោយប្រើប្រាស់ក្បាលដោះនេះដែរ។ ជាក់ស្ដែង អ្នកទិញម្នាក់បានលើកឡើងថា៖ «គុណភាពវាល្អ ទន់ ស្រួលបៀម។ វាអត់ធ្វើឱ្យខ្ញុំពិបាកដកដង្ហើមនោះឡើយ»។ អ្នកទិញម្នាក់ទៀត ដែលរងសម្ពាធពីការងារ បាននិយាយដែរថា បៀមក្បាលដោះនេះជួយឱ្យនាងមានអារម្មណ៍ដូចត្រឡប់ទៅកាលពីក្មេងវិញ។
ទោះជាយ៉ាងណា ការផ្ទុះពេញនិយមបៀមក្បាលដោះពីសំណាក់មនុស្សពេញវ័យនេះដែរ បានធ្វើឱ្យអ្នកជំនាញផ្នែកចិត្តសាស្ត្រមានការបារម្ភជាខ្លាំង។ ជាក់ស្ដែង តាមការលើកឡើងពីគ្រូពេទ្យចិត្តសាស្ត្រក្នុងស្រុកបានឱ្យដឹងថា ហេតុការណ៍ដែលបានកើតឡើងនេះគឺពាក់ព័ន្ធនឹងបញ្ហាផ្លូវចិត្តមួយហៅថា «ការវិលត្រឡប់ក្រោយវិញ» នៅពេលដែលមនុស្សពេញវ័យវិលត្រឡប់ទៅស្ថានភាពដូចជាក្មេងវិញទាំងមិនដឹងខ្លួន ដើម្បីរកសុវត្ថិភាពផ្លូវចិត្តពេលដែលរងការស្ត្រេសខ្លាំងពេក។
គ្រូពេទ្យដដែលនេះបានសង្កត់បញ្ជាក់ទៀតថា ការរកជំនួយពីការបៀមក្បាលដោះគឺអាចជួយដោះស្រាយបានត្រឹមមួយគ្រាៗប៉ុណ្ណោះ និង ថែមទាំងអាចបណ្ដាលឱ្យអ្នកប្រើប្រាស់លែងហ៊ានប្រឈមដោះស្រាយបញ្ហាជីវិតដោយខ្លួនឯងថែមទៀត។ បន្ថែមពីនេះ គ្រូពេទ្យផ្នែកសុខភាពមាត់ធ្មេញម្នាក់ ក៏បានព្រមានដែរពាក់ព័ន្ធនឹងការប្រើប្រាស់ក្បាលដោះរយៈពេលយូរ គឺវាប្រឈមហានិភ័យប៉ះពាល់សុខភាពច្រើន ព្រោះតែទម្រង់មាត់មនុស្សធំគឺខុសគ្នាស្រឡះពីមាត់ទារក៕
