ទើបដំណើរការរុករកយន្តហោះ MH370 បាន ៣ ថ្ងៃ ឥលូវក្រុមហ៊ុនត្រូវផ្អាកជាថ្មី ក្រោយយន្តហោះនេះបាត់ខ្លួនអស់ពេល ១១ ឆ្នាំ

ក្រុមហ៊ុន Ocean Infinity បានធ្វើការផ្អាកដំណើរការរុករកយន្តហោះ MH370 ក្រោយចុះប្រតិបត្តិការបានប្រមាណ ៣ ថ្ងៃ ដោយទម្លាយគម្រោងផ្ដើមរុករកវិញនៅចុងឆ្នាំ ២០២៥ នេះ។

តាមការបញ្ជាក់ពីរដ្ឋមន្ត្រីក្រសួងដឹកជញ្ជូនប្រចាំប្រទេសម៉ាឡេស៊ី លោក Anthony Loke នៅថ្ងៃទី ០៣ ខែមេសា ឆ្នាំ ២០២៥ នេះបានរៀបរាប់ថា៖ «ក្រុមរុករកបានផ្អាកដំណើរចុះប្រតិបត្តិការសិន ដោយពួកគេនឹងបន្តឡើងវិញនៅចុងឆ្នាំនេះ»។ ក្នុងថ្ងៃជាមួយគ្នានោះដែរ ខាងសមាគមគ្រួសារអ្នកដំណើរ និង បុគ្គលិកយន្តហោះMH370 ក៏បានប្រកាសដែរថា ក្រុមហ៊ុន Ocean Infinity បានផ្អាកការរុករកចាប់ពីថ្ងៃទី ២៨ ខែមីនា កន្លងទៅ និង បន្តប្រតិបត្តិការវិញនៅពេលអឌ្ឍគោលខាងត្បូងប្ដូរទៅដល់រដូវក្ដៅ ដែលចន្លោះពីខែធ្នូ ឆ្នាំ ២០២៥ ដល់ខែកុម្ភៈ ឆ្នាំ ២០២៦ នៅពេលដែលអាកាសធាតុល្អប្រសើរជាងនេះ។

គួររំឭកថា យន្តហោះ Boeing 777 ជើងហោះហើរលេខ MH370 ដឹកមនុស្សសរុប ២៣៩ នាក់ បានបាត់ខ្លួនពីកញ្ចក់រ៉ាដាកាលពីថ្ងៃទី ០៨ ខែមីនា ឆ្នាំ ២០១៤ កន្លងទៅ ខណៈគោលដៅហោះចេញពីទីក្រុងកូឡាឡាំពួរ ប្រទេសម៉ាឡេស៊ី ឆ្ពោះទៅកាន់ទីក្រុងប៉េកាំង ប្រទេសចិន។ ក្នុងរយៈពេល ១១ ឆ្នាំមកនេះ បេសកកម្មរុករកជាច្រើនត្រូវបានធ្វើឡើងប៉ុន្តែនៅតែមិនទទួលបានលទ្ធផលច្បាស់លាស់អ្វីនោះឡើយ៕