នៅព្រឹកថ្ងៃទី ១៤ ខែកុម្ភៈ ឆ្នាំ ២០២៥ នេះ ខាងភ្នាក់ងារពន្លត់អគ្គិភ័យប្រចាំប្រទេសថៃត្រូវបានគេរាយការណ៍ពីករណីអគ្គិភ័យមួយឆាបឆេះអគារពាណិជ្ជកម្មកម្ពស់ ៤ ជាន់ មួយកន្លែងនាក្រុង Pattaya ខេត្ត Chonburi ប្រទេសថៃ។
ទីតាំងដែលឆាបឆេះត្រូវបានខាងអាជ្ញាធរកំណត់បានច្បាស់ថាជាកន្លែងដាំកញ្ឆារបស់ក្រុមហ៊ុន Little Christiana ដោយខាងក្រុមពន្លត់បានចុះទៅដល់ទីតាំងធ្វើការពន្លត់ភ្លាមៗផងដែរ។ តាមការស៊ើបអង្កេតបឋមបានឱ្យដឹងថា ភ្លើងឆាបឆេះដំបូងចេញពីជាន់ទី ២ ទៅ ដែលជាទីតាំងបន្ទប់ទុកសម្រាប់ដាំកញ្ឆា។ ខាងក្រុមពន្លត់អគ្គិភ័យមានការលំបាកក្នុងការចូលទៅពន្លត់ខ្លាំងមែនទែនដោយសារតែផ្សែងខ្មួលខ្មាញ់ពេក ហើយក្លិនកញ្ឆាក៏សាយភាយពាសពេញទីតាំងនោះដូចគ្នា។
យ៉ាងណាមិញ រយៈពេលប្រមាណជាង ៣០ នាទី ក្រោយមកក្រោមការស្វះស្វែងពីភ្នាក់ងារពន្លត់ ភ្លើងក៏ត្រូវគ្រប់គ្រងបាន ប៉ុន្តែផ្សែង និង ក្លិននៃការឆេះដើមកញ្ឆានៅតែបន្តសាយភាយចេញពីអគារទៅកាន់តំបន់ក្បែរនោះដដែល។ លោកស្រី Kanjana Fungsanthia អាយុ ៤០ ឆ្នាំ ជាអ្នកគ្រប់គ្រងទីតាំងដាំកញ្ឆាបានលើកឡើងថា ទីតាំងដែលមានឆាបឆេះនេះគឺទទួលបានអាជ្ញាប័ណ្ណស្របច្បាប់ឱ្យដាំដុះដើមកញ្ឆា ហើយលោកស្រីសង្ស័យថាមូលហេតុធ្វើឱ្យមានភ្លើងឆេះនេះអាចបណ្ដាលមកពីទុសេខ្សែភ្លើង។ ការខូចខាតដោយសារអគ្គិភ័យនេះដែរ តាមការប៉ាន់ប្រមាណដំបូងគឺអស់ប្រហែលខ្ទង់ ២០ ម៉ឺនបាត (ប្រមាណជិត ៦ ម៉ឺនដុល្លារ) តែក៏ជាងសំណាងល្អមួយដែរ ក្នុងហេតុការណ៍នេះមិនមាននរណាម្នាក់របូស ឬស្លាប់។
ដោយឡែក ទោះបីភ្លើងរលត់អស់ ប៉ុន្តែផ្សែង និង ក្លិនចេញពីដើមកញ្ឆាបានប៉ះពាល់ខ្លាំងទៅដល់ពលរដ្ឋ ក៏ដូចជាអ្នកទេសចររស់នៅជុំវិញទីតាំងនោះ។ មនុស្សជាច្រើនកើតមានអាការប្លែក អ្នកខ្លះដូចស្រវឹង ខ្លះឈឺក្បាល ឯខ្លះទៀតថែមទាំងមានអាការសើចឥតឈប់ទៀតផង។ បច្ចុប្បន្ន ខាងអាជ្ញាធរកំពុងធ្វើការស៊ើបអង្កេតបន្តរកមូលហេតុពិតប្រាកដនៃការឆាបឆេះនេះ៕
ប្រភព៖ Kenh14
