ថ្មីៗនេះ រឿងរ៉ាវរបស់ស្ត្រីវ័យ ៣៧ ឆ្នាំម្នាក់ ជាអ្នកខេត្ត Jilin ប្រទេសចិន កំពុងផ្ទុះការចាប់អារម្មណ៍ជាខ្លាំង ក្រោយរូបនាងបានចេញមកទម្លាយថាខ្លួនមានទម្លាប់មិនដែលលាងគ្រឿង make-up ចេញពីមុខបានត្រឹមត្រូវក្នុងរយៈពេល ២២ ឆ្នាំមកនេះ រហូតធ្វើឱ្យមុខរបស់ខ្លួនកើតអាការឡើងក្រហមងាំងមើលមិនយល់។
តាមរយៈវីដេអូដែលផ្ទុះលើបណ្ដាញសង្គមក្នុងប្រទេសចិន ស្ត្រីខាងលើត្រូវបានស្គាល់ឈ្មោះថា Gao បានត្អូញថា មុខរបស់នាងរមាស់ខ្លាំងរហូតទ្រាំមិនបាន។ នាងពួនក្នុងផ្ទះរាល់ថ្ងៃមិនដែលហ៊ានចេញក្រៅផ្ទះឡើយ។ ជាក់ស្ដែងដូចដែលបានបង្ហាញ មុខរបស់នាងគឺឡើងហើម និង ក្រហមខ្លាំងរហូតអ្នកលេងបណ្ដាញសង្គមនៅចិនមួយចំនួនប្រដូចទៅនឹងមុខរបស់អ្នកតា គ័ន កុង។
ដើមហេតុបណ្ដាលឱ្យមុខមាត់ក្លាយទៅជាបែបនេះ ស្ត្រីរូបនេះបាននិយាយថា រូបនាងគឺចាប់អារម្មណ៍ងប់ងល់នឹងការផាត់មុខតាំងពីអាយុ ១៥ ឆ្នាំមកម្ល៉េះ ក្រោយនាងលួចយកក្រែមលាបមាត់ម្ដាយយកមកលាប។ ក្រោយមកនាងក៏ញៀននឹងការប្រើប្រាស់គ្រឿងផាត់មុខផាត់មាត់ ប៉ុន្តែមិនដែលខ្វល់នឹងគ្រឿងលុបលាងគ្រឿងសម្អាងទាំងនោះចេញវិញឡើយ ដោយគិតថាវាស៊ាំញ៉ាំ និង មិនចាំបាច់។ នាងបាននិយាយថា៖ «ហេតុអីចាំបាច់លាងវាចេញវិញធ្វើអី បើគង់តែលាបវាវិញដដែលហ្នឹង»។
ជាមួយផ្នត់គំនិតនេះហើយ ទើបេយៈពេល ២២ ឆ្នាំមកនេះ រូបនាងគឺមិនដែលប្រើប្រាស់សាប៊ូ ឬក៏ហ្វូមលាងមុខអ្វីឡើយក្នុងការលុបលាងមុខខ្លួនឯងឱ្យបានស្អាតត្រឹមត្រូវ ដោយនាងគ្រាន់តែយកទឹកធម្មតាលុបមុខចេញពេលយប់ប៉ុណ្ណោះ។ យ៉ាងណាមិញ ទម្លាប់ធម្មតាមិនខ្វាយខ្វល់មុខមាត់ខ្លួមឯងមួយនេះក៏បានធ្វើឱ្យនាងជួបបញ្ហាក្នុងឆ្នាំនេះ ដោយរូបនាងបានចាប់ផ្ដើមមានប្រតិកម្មអាលែកហ្ស៊ីរហូតមុខឡើងហើមក្រហមច្រាលមើលលែងយល់។
មុខប្រតិកម្មបែបនេះហើយ Gao ក៏មិនបានទៅពេទ្យសើស្បែកភ្លាមៗដែរ តែរូបនាងបែរជាទៅគ្លីនិកកែសម្ផស្សទៅចាក់ «skin booster» រហូតធ្វើឱ្យស្ថានភាពមុខរបស់នាងកាន់តែអាក្រក់ឡើងថែមទៀត។ ក្រុមអ្នកជំនាញសើស្បែកបានដាក់ការសង្ស័យថា ស្ថានភាពស្បែកមុខរបស់នាងប្រែជាអាក្រក់អាចបណ្ដាលមកពីកត្តាមួយចំនួនផ្សេងទៀតក្រៅពីការលុបលាងមុខមិនបានត្រឹមត្រូវ ដូចជាការប្រើប្រាស់ថ្នាំកែសម្ផស្សមិនបានត្រឹមត្រូវ ឬលុបលាងសម្អាតមុខខ្លួនឯងជ្រុលជាដើម។ ជាមួយគ្នានោះដែរ ក៏មានការផ្ទុះវែកញែកបែកផ្សែងពាសពេញបណ្ដាញសង្គមនៅចិនផងដែរ ជុំវិញករណីរបស់ស្ត្រីខាងលើនេះ៕
ប្រភព៖ 8days
