នៅពេលនិយាយដល់កន្លែងដែលពិបាក និង ឯកោជាងគេបំផុតលើពិភពលោក មនុស្សជាច្រើននាំគ្នានឹកភ្នកភ្លាមដល់តំបន់ទឹកកកអង់តាកទិច ឬក៏អាកទិច។ យ៉ាងណាមិញ ទាំងនោះមិនមែនជាទីតាំងដែលពិបាក និង ឆ្ងាយខ្លាំងបំផុតពីកន្លែងដែលមនុស្សអាចរស់នៅបានឡើយ ដោយកន្លែងដែលឆ្ងាយជាងគេបំផុតនោះគឺមានឈ្មោះថា «Point Nemo»។
មានទីតាំងស្ថិតនៅជ្រៅក្នុងមហាសមុទ្រប៉ាស៊ីហ្វិក តំបន់ Point Nemo គឺជាកន្លែងដែលដាច់ស្រយាលជាងគេបំផុតលើភពផែនដីយើងនេះ។ ក្នុងរយៈចម្ងាយប្រមាណ ២៥៧៤ គីឡូម៉ែត្រពីដីគោក តំបន់មួយនេះគឺជាតំបន់ដែលដាច់ឆ្ងាយឯកោជាងគេ។ ប្រសិនបើយើងឈរនៅចំណុចតំបន់ Point Nemo នោះយើងនឹងនៅទីតាំងមួយដែលឆ្ងាយជាងគេបំផុតនៃទីតាំងមនុស្សរស់នៅលើផែនដីយើងនេះ។
ដោយសារតែជាទីតាំងដាច់ស្រយាលគ្មានមនុស្សទៅដល់នេះហើយ ទើបបានជាតំបន់ Point Nemo ត្រូវបានចាត់ទុកជាកន្លែងដ៏ស័ក្តិសមបំផុតក្នុងការបោះចោលយានអវកាសខូចៗ។ នៅទីនោះ ត្រូវបានគេឱ្យឈ្មោះថាជា «កន្លែងបញ្ចុះសពយានអវកាស» ដោយផ្កាយរណប យានអវកាស ឬបំណែកយានដែលខូចៗរាប់រយគ្រឿងត្រូវបានយកទៅបោះចោលនៅទីនោះ។
ខាងទីភ្នាក់ងារអវកាសបានជ្រើសរើសតំបន់ Point Nemo នេះដែរ ដោយសារតែវាជាទីកន្លែងមួយល្អបំផុតសម្រាប់ចោលគ្រឿងម៉ាស៊ីអវកាសខូចៗដោយមិនធ្វើឱ្យប៉ះពាល់ ឬគ្រោះថ្នាក់ដល់មនុស្ស ព្រោះថារយៈចម្ងាយឆ្ងាយខ្លាំងពីដីគោកធ្វើឱ្យទីតាំងនេះស្ទើរតែគ្មានភាវៈមានជីវិតរស់នៅបានដោយរក្សាទុកសម្រាប់តែសត្វសមុទ្រមួយចំនួនតូចដែលអាចបន្ស៊ាំខ្លួននឹងបរិយាកាសទីនោះប៉ុណ្ណោះ។
គួរឱ្យដឹងថា បើទោះជាបច្ចុប្បន្នមិនមាននរណាម្នាក់អាចទៅជាន់តំបន់ Point Nemo ក៏ពិតមែន ប៉ុន្តែទីតាំងមួយនេះនៅតែទាក់ទាញចំណាប់អារម្មណ៍របស់អ្នកវិទ្យាសាស្ត្រ និង អ្នករុករកផ្សងព្រេងជាច្រើនដដែល។ តំបន់ Point Nemo គឺជាទីតាំងមួយដែលបញ្ជាក់ថា ភពផែនដីយើងនៅមានអាថ៌កំបាំងជាច្រើនដែលត្រូវរុករក ហើយក៏មានទីកន្លែងជាច្រើនដែលមនុស្សមិនទាន់អាចដោះស្រាយបានដែរ៕
ប្រភព៖ Kenh14
