ក្មេងប្រុសម្នាក់ឈ្មោះ Jaren Gamongan មកពីតំបន់ Apayao ប្រទេសហ្វីលីពីន បានកើនមានជំងឺកម្រម្យ៉ាងដែលបណ្ដាលឱ្យរូបរាងកាយរបស់គេពោរពេញទៅដោយរោមដុះពេញខ្លួនប្រៀបដូចជាសត្វចចក។
យ៉ាងណាមិញ បើតាមសម្ដីស្ត្រីជាម្ដាយដែលជាអ្នកមានអប្បិយជំនឿជឿលើបុណ្យបាប បាននិយាយថារូបរាងកាយខុសប្រក្រតីរបស់កូនគាត់ គឺបណ្ដាលមកពីបាបកម្មដែលគាត់ហូបសត្វឆ្មាព្រៃពេលកំពុងពពោះកូន។ គាត់បានរៀបរាប់ថា អំឡុងពេលពពោះគាត់មានអាការចាញ់ចង់ហូបសាច់ឆ្មាព្រៃជាខ្លាំង ដែលសត្វកម្រប្រភេទនេះអាចរកឃើញមាននៅក្នុងតំបន់ភ្នំដាច់ស្រយាលដែលគាត់កំពុងរស់នៅនោះ។
ក្រោយមក គាត់ក៏បានដូចចិត្តដែលបានសត្វឆ្មាព្រៃពីអ្នករស់នៅក្នុងភូមិជាមួយគ្នា រួចក៏យកមកធ្វើអាហារទទួលទានយ៉ាងឆ្ងាញ់ ប៉ុន្តែក្រោយមកក៏នឹកចាប់ផ្ដើមស្ដាយក្រោយនៅពេលដែលកូនកើតមកមានសភាពបែបនេះ ហើយអ្នកក្នុងភូមិក៏មានជំនឿដូចនាងដូចគ្នា។
ទោះជាយ៉ាងណា ក្រៅពីជំនឿស្ត្រីជាម្ដាយក៏បាននាំយកកូនទៅជួបគ្រូពេទ្យជំនាញផងដែរដើម្បីពិនិត្យមើលថាកូនរបស់គាត់កើតមានជំងឺអ្វីឱ្យពិតប្រាកដ ហើយក្រោយពិនិត្យរួចគ្រូពេទ្យក៏បានរកឃើញថាក្មេងប្រុសរូបនោះបានកើតមានជំងឺម្យ៉ាងហៅថា «hypertrichosis» ដែលជាជំងឺកម្របំផុតមួយកើតមានឡើងលើមនុស្សតែ ៥០ ទៅ ១០០ នាក់ប៉ុណ្ណោះលើសកលលោកតាំងពីសម័យយុគកណ្ដាលមក។ តាមគ្រូពេទ្យបានបញ្ជាក់ដែរថា ជំងឺកម្រប្រភេទនេះគឺមិនមានថ្នាំព្យាបាលនោះឡើយតែការបាញ់ឡាស៊ែជម្រុះរោមអាចជួយសម្រួលស្ថានភាពជំងឺបានខ្លះ៕
