ភ្ញាក់ផ្អើល! ប្រទះឃើញតួស្រីរឿង «យុទ្ធសិល្ប៍បិសាចពស់» លក់ជើងមាន់អាំងតាមផ្លូវ ក្រោយជួបការលំបាកក្នុងសិល្បៈ

តារាសម្ដែងស្រី Casper Chan ដែលធ្លាប់បង្ហាញខ្លួនសម្ដែងក្នុងរឿងជាច្រើនរបស់ទូរទស្សន៍ TVB ជាពិសេសគឺរឿង «យុទ្ធសិល្ប៍បិសាចពស់» នោះ ថ្មីៗនេះបានធ្វើឱ្យមហាជនជាច្រើនភ្ញាក់ផ្អើល ក្រោយឃើញរូបនាងឈរលក់ជើងមាន់អាំងនៅតាមដងផ្លូវ ក្រោយអត់មានការងារធ្វើជួបប្រទះការលំបាកមួយរយៈ។

តាមសារព័ត៌មាន Oriental Daily បានឱ្យដឹងថា ការងាកមកចាប់ផ្ដើមលក់ដូរនៅផ្សាររាត្រីក្នុងក្រុង Foschan ប្រទេសចិននេះដែរ តារាស្រី Casper Chan គឺទទួលបានការណែនាំពីមិត្តរួមអាជីពគឺលោក Vin Choi Kay-Chun។ ជាក់ស្ដែង ក្នុងវីដេអូមួយដែលបង្ហោះលើគណនីផ្ទាល់ខ្លួន លោក Vin Choi Kay-Chun បាននិយាយថា លោកពិចារណាដិតដល់ណាស់ រួមទាំងគិតគូរពីការលំបាករួចជាស្រេចហើយមុននឹងសម្រេចចិត្តចាប់យកមុខរបរមួយនេះ។

ងាកមកតារាស្រី Casper វិញ នាងក៏បាននិយាយដែរថា នាងមិនបារម្ភឬខ្លាចក្នុងការចាប់ផ្ដើមមុខរបរថ្មីក្នុងវ័យ ៤៣ ឆ្នាំ ទាំងខ្លួនឯងមានដៃទទេនេះទេ។ នាងចង់រៀនសូត្រពីបទពិសោធរបស់អ្នកដទៃដែលប្រឹងប្រែងរកស៊ីរហូតកាក់កបល្អ។ ក្នុងនោះដែរ លោក Vin Choi Kay-Chun បានប្រាប់នាងដែរថា នាងអាចនឹងទទួលបានមតិមិនល្អពីមហាជន ប៉ុន្តែនាងបានឆ្លើយតបវិញថា៖ «ខ្ញុំបានគិតពីវាដិតដល់ហើយ ក្នុងជីវិតមួយនេះ គ្មានអ្វីដែលយើងធ្វើមិនបាននោះទេ»។

គួរឱ្យដឹងផងដែរថា អតីតតារា TVB លោក Vin Choi Kay-Chun បានចាប់មុខរបរលក់ជើងមាន់អាំងតាមផ្លូវនៅផ្សាររាត្រីនេះរយៈពេលប៉ុន្មានឆ្នាំមកហើយ ដោយលោកក៏ធ្លាប់បាននិយាយដែរថាក្រុមគ្រួសារលោករស់នៅស្រួលកុំតែបានមុខរបរមួយនេះទេ៕