ក្ដៅៗ! Yoo Ah In ត្រូវដោះលែងឱ្យនៅក្រៅឃុំ ក្រោយជាប់ពន្ធនាគារបាន ៥ ខែ ជុំវិញករណីប្រើថ្នាំខុសច្បាប់

ដោយទទួលបានជ័យជម្នះក្នុងការកាត់ក្ដីបណ្ដឹងឧទ្ធរណ៍ តារាសម្ដែង Yoo Ah In ត្រូវបានដោះលែងពីពន្ធនាគារឱ្យនៅក្រៅឃុំ ក្រោយជាប់ក្នុងនោះរយៈពេល ៥ ខែ។

គួរឱ្យដឹងថា Yoo Ah In ដំបូងឡើយត្រូវបានកាត់ទោសឱ្យជាប់ពន្ធនាគាររយៈពេល ១ ឆ្នាំ ប៉ុន្តែយ៉ាងណាមិញ តុលាការកំពូលក្រុងសេអ៊ូលបានបើកសវនាការជំនុំជម្រះលើបណ្ដឹងឧទ្ធរណ៍លើករណីរបស់ Yoo Ah In ដែលប្រើប្រាស់ថ្នាំញៀនខុសច្បាប់ និង សម្រេចកាត់ក្ដីឱ្យលោកអាចចេញពីពន្ធនាគារបានប៉ុន្តែនៅស្ថិតក្រោមការឃ្លាំមើល ការពិន័យជាសាច់ប្រាក់ចំនួន ២ លានវ៉ុន (ប្រមាណ ១៣៩០ ដុល្លារ) ជាមួយនឹងប្រាក់ពិន័យបន្ថែម ១.៥៥ លានវ៉ុន (ប្រមាណ ១០៧០ ដុល្លារ) ធ្វើការក្នុងសហគមន៍រយៈពេល ៨០ ម៉ោង និង ចូលរៀនថ្នាក់កែប្រែរយៈពេល ៤០ ម៉ោង។

គួររំឭកថា តារាសម្ដែង Yoo Ah In ដំបូងឡើយត្រូវបានតុលាការកាត់ទោសឱ្យជាប់ពន្ធនាគាររយៈពេល ១ ឆ្នាំពេញ ក្រោយចាប់លោកបានប្រើប្រាស់ថ្នាំ propofol ដោយគ្មានការអនុញ្ញាតត្រឹមត្រូវចំនួន ១៨១ ដង។ បន្ថែមពីនេះ Yoo Ah In ក៏បានជាប់ចោទលើករណីបើកថ្នាំដោយប្រើប្រាស់អត្តសញ្ញាណមនុស្សម្នាក់ផ្សេងទៀត រួមទាំងការជក់កញ្ឆានៅក្រៅប្រទេសផងដែរ។ យ៉ាងណាមិញ បទចោទប្រកាន់លើករណីជក់កញ្ឆាគឺត្រូវបានដកចេញវិញដោយសារតែគ្មានភស្តុតាងគ្រប់គ្រាន់៕