កន្លែងបញ្ចុះសពនៅក្រុង Sagaing ប្រទេសមីយ៉ាន់ម៉ា ដែលជាចំណុចកណ្ដាលនៃគ្រោះរញ្ជួយដីកម្រិត ៧.៧ រ៉ិចទ័រ ទទួលសាកសពជនរងគ្រោះច្រើនលើសលប់ខ្លាំងរហូតត្រូវបង្ខំបញ្ចុះសពមនុស្សច្រើននាក់ក្នុងផ្នូរជាមួយគ្នា។
Photo: AFP
តាមការបញ្ជាក់ប្រាប់ពីអ្នករស់នៅក្រុង Sagaing ម្នាក់ឈ្មោះ Aye Moe កាលពីថ្ងៃទី ០១ ខែកុម្ភៈ ឆ្នាំ ២០២៥ កន្លងទៅបានរៀបរាប់ថា៖ «សាកសពជនរងគ្រោះបានសាយភាយក្លិនតាំងពីម្សិលមិញ ហើយថ្ងៃនេះទៀត ក្លិនសពគឺកាន់តែខ្លាំងរហូតមិនអាចព័ណ៌នាបាន។ ខាងកន្លែងបញ្ចុះត្រូវកប់សាកសពមនុស្ស ១០ នាក់ក្នុងផ្នូរតែមួយ ហើយពេលដែលអស់កន្លែងបញ្ចុះតទៅទៀត ពួកគេត្រូវដឹកជញ្ជូនសាកសពដែលនៅសល់ទៅក្រុង Mandalay ដែលនៅក្បែរខាងដើម្បីបូជា ប៉ុន្តែនៅទីនោះឥលូវក៏គ្មានឡគ្រប់គ្រាន់ដូចគ្នា»។
Photo: AFP
Aye Moe បានឱ្យដឹងទៀតថា ក្រុមសង្គ្រោះគឺមិនទាន់ទៅដល់ក្រុង Sagaing នៅឡើយទេ ដោយអ្វីៗគ្រប់យ៉ាងខាងពលរដ្ឋក្នុងតំបន់ជាអ្នកចាត់ការដោយខ្លួនឯង។ លោកបាននិយាយថា៖ «ពលរដ្ឋក្នុងតំបន់ចាត់ការគ្រប់យ៉ាងដោយខ្លួនឯង ហើយពួកយើងនៅមិនទាន់ដឹងចំនួនសាកសពជនរងគ្រោះទាំងអស់ប៉ុន្មាននាក់ឱ្យប្រាកដនោះឡើយ។ ក្នុងមន្ទីរពេទ្យមានទាំងអ្នករបួស និង សាកសព ដោយស្ថានការណ៍គឺពិបាកគ្រប់គ្រងមែនទែន។ បុគ្គលិកក៏គ្មាន ហើយក្មេងៗដែលពេញកម្លាំងខ្លះបានភៀសខ្លួនចូលព្រៃ ឯខ្លះទៀតបានចាកចេញពីប្រទេស»។
ងាកទៅតំបន់ Kyar Ni Kan វិញ រថយន្តសង្គ្រោះបានបន្តបណ្ដាក់គ្នាដឹងជញ្ជូនសពជនរងគ្រោះយកទៅបូជា។ សាកសពប្រមាណជា ៣០០ នាក់ត្រូវបានដឹកយកទៅទីតាំងនោះ ដោយក្នុងនោះ ត្រឹមតែថ្ងៃទី ៣០ ខែមីនា ឆ្នាំ ២០២៥ តែឯងមានសាកសព ១០០ នាក់ទៅហើយ ដែលបង្ខំឱ្យខាងកន្លែងបូជាសពត្រូវបើកបន្ត ៦ ម៉ោងលើសពេលវេលាធម្មតា។
គួរបញ្ជាក់ដែរថា គិតមកទល់ពេល ចំនួនអ្នកដែលបានស្លាប់ដោយគ្រោះរញ្ជួយដីនៅប្រទេសមីយ៉ាន់ម៉ាបានកើនដល់ជាង ២៧០០ នាក់ហើយ ដោយចំនួនអាចកើនដល់ ៣ ពាន់នាក់ ស្របពេលខាងក្រុមរុករក និង សង្គ្រោះកំពុងស្វះស្វែងរុករកបន្ថែមតាមក្រុង និង ភូមិដែលរងគ្រោះដោយគ្រោះមហន្តរាយនេះ៕
ប្រភព៖ VN Express
