កាលពីថ្ងៃទី ១៨ ខែកុម្ភៈ ឆ្នាំ ២០២៥ កន្លងទៅ មហាជនអ្នកលេងបណ្ដាញសង្គមជាច្រើននៅចិនមានការភ្ញាក់ផ្អើលជាខ្លាំង ដោយតារា TikTok វ័យ ៣៧ ឆ្នាំដ៏ល្បីឈ្មោះម្នាក់ដែលគេស្គាល់ច្បាស់ថាជា «លោកសង្ឃថាំងចេង» (Tang Monk) នៅក្រុង Zhengzhou ប្រទេសចិន បានទទួលមរណភាពទៅហើយ។ ដំណឹងមរណភាពរបស់លោកត្រូវបានប្រកាសដោយសាច់ញាតិក្រុមគ្រួសារ ហើយពិធីបុណ្យសពបានរៀបចំធ្វើនៅថ្ងៃទី ១៩ ខែកុម្ភៈកន្លងទៅក្នុងផ្ទះរបស់លោកផ្ទាល់។
តាមព័ត៌មានបានឱ្យដឹងថា តារា TikTok ដ៏ល្បីរូបនេះទទួលមរណភាពភ្លាមៗដោយជំងឺគាំងបេះដូង ដោយការស្លាប់របស់លោកមិនមាននរណាម្នាក់ដឹងនោះឡើយរហូត ២, ៣ ថ្ងៃក្រោយទើបមានអ្នកប្រទះឃើញ។ គួរឱ្យដឹងថា ដើម្បីឱ្យការ live វីដេអូមានភាពងាយស្រួល Tang Monk គឺមិនធ្វើការ live វីដេអូក្នុងផ្ទះខ្លួនឯងនោះឡើយ ដោយលោកសុខចិត្តទៅជួលបន្ទប់ឯកជនមួយនៅជាយក្រុង Zhengshou។ ក្រោយមិនបានឃើញលោកចេញពីបន្ទប់ប៉ុន្មានថ្ងៃទើបម្ចាស់ផ្ទះសម្រេចចូលទៅមើល ទើបរកឃើញថាលោកបានស្លាប់បាត់ទៅហើយ។
Tang Monk បានផ្ទុះប្រជាប្រិយភាពខ្លាំងលើបណ្ដាញសង្គម TikTok នៅចិន ដោយសារតែលោកជាញឹបញាប់តែងតែតុបតែងខ្លួនគ្រងស្បង់ជាលោកសង្ឃថាំងចេង។ យ៉ាងណាមិញ ក្រោយមកដោយសារតែលោករវល់ខ្វាយខ្វល់តែជាមួយរឿង live វីដេអូពេក មិនមានពេលវេលាមើលថែគ្រួសារ ទើបប្រពន្ធរបស់លោកសម្រេចលែងលះគ្នាជាមួយលោក ទុកឱ្យលោកនៅមើលថែទាំកូនប្រុសទាំង ២ នាក់។ ការទទួលបន្ទុកមើលថែកូននេះហើយ បានបង្ខំឱ្យលោកត្រូវប្រឹងប្រែងខ្លាំងជាងមុនលើការងារ live វីដេអូនេះ។
ទោះយ៉ាងណា ក្នុងពេលប៉ុន្មានឆ្នាំនេះ ចំណូលដែលរកបានពីការ live វីដេអូគឺមិនទទួលបានច្រើនដូចមុនឡើយ ទើបលោកត្រូវដាច់យប់មិនដេកមិនពួន រិះគិតរកវិធីធ្វើ content អ្វីថ្មីប្លែកអាចទាក់ទាញមនុស្សឱ្យចូលមើលច្រើន។ ការគិតពីរឿងរកលុយខ្លាំងក្លានេះហើយ បានធ្វើឱ្យលោកភ្លេចគិតពីសុខភាពខ្លួនឯងរហូតការងារមួយនេះឆក់យកអាយុជីវិតលោកទៅចោលកូនៗឱ្យកំព្រាឪពុកទាំងក្មេងវ័យបែបនេះ៕
ប្រភព៖ Kenh14
