ថ្មីៗនេះ ទិដ្ឋភាពពលរដ្ឋរងគ្រោះដោយគ្រោះរញ្ជួយដីនៅក្រុង Medellin ភាគខាងជើងខេត្ត Cebu ប្រទេសហ្វីលីពីន កំពុងធ្វើឱ្យមហាជនជាច្រើនខ្លោចចិត្តជាខ្លាំង ដោយពួកគេត្រូវបង្ខំចិត្តគេងកណ្ដាលវាល យកថង់ប្លាស្ទិកគ្របរុំខ្លួនការពារទឹកភ្លៀង ព្រោះតែគ្មានដំបូលជ្រក ជំរុំជម្លៀសខ្លួនបណ្ដោះអាសន្នមានមិនគ្រប់គ្រាន់ ក្រោយរងការវាយប្រហារដោយគ្រោះរញ្ជួយដី។
ទិដ្ឋភាពនេះដែរ ត្រូវថតបានកាលពីយប់ថ្ងៃទី ០១ ខែតុលា ឆ្នាំ ២០២៥ កន្លងទៅ អំឡុងពេលមេឃកំពុងមានភ្លៀងធ្លាក់ខ្លាំង។ ក្រោយហេតុការណ៍គ្រោះរញ្ជួយដីកើតឡើងកាលពីថ្ងៃទី ៣០ ខែកញ្ញា ឆ្នាំ ២០២៥ កន្លងទៅ ពលរដ្ឋរងគ្រោះទាំងអស់ត្រូវបានណែនាំឱ្យនៅក្រៅអគារ ឬផ្ទះសម្បែងរបស់ពួកគេសិន ដើម្បីធានាសុវត្ថិភាព។
ជាមួយរូបភាពដ៏គួរឱ្យអាណិតនេះដែរ ខាងព័ត៌មានបានបញ្ជាក់បន្ថែមថា ក្រៅពីត្រូវការតង់ជម្រកដល់ពួកគេបន្ថែម ពលរដ្ឋរងគ្រោះទាំងនោះក៏កំពុងតែត្រូវការទឹក និង ស្បៀងអាហារជាចាំបាច់ផងដែរ៕
ប្រភព៖ CDN Digital
