លិចទូកនេសាទនៅកូរ៉េខាងត្បូង មានស្លា./ប់ និង បាត់ខ្លួនច្រើននាក់ ខណៈអាជ្ញាធរកំពុងខ្វាត់ខ្វែងជួយ

សារព័ត៌មានកូរ៉េ Yonhap បានចេញផ្សាយថា មានករណីទូកនេសាទទម្ងន់ ១៣៩ តោនមួយគ្រឿងបានលិចក្នុងសមុទ្រជិតក្រុង Yeosu ប្រទេសកូរ៉េខាងត្បូង បណ្ដាលឱ្យមនុស្សចំនួន ៤ នាក់បានស្លាប់ ខណៈ ៥ នាក់ផ្សេងទៀតកំពុងបាត់ខ្លួន។

តាមព័ត៌មានដដែលបានឱ្យដឹងថា ទូកនេសាទខាងលើបានចេញពីកំពង់ផែក្រុង Busan ឆ្ពោះទៅនេសាទក្នុងសមុទ្រ ប៉ុន្តែនៅវេលាម៉ោងប្រមាណជា ១ និង ៤១ នាទីយប់រំលងអធ្រាត្រឈានចូលថ្ងៃទី ០៩ ខែកុម្ភៈ ឆ្នាំ ២០២៥ (ពេលវេលាក្នុងតំបន់) ទូកមួយគ្រឿងនោះក៏បានបាត់ពីរ៉ាដានៅត្រង់ចំណុចទីតាំងសមុទ្រជិតក្រុង Yeosu ចម្ងាយប្រមាណ ៣៨០ គីឡូម៉ែត្រ ភាគខាងត្បូងក្រុងសេអ៊ូល។ លើទូកនេសាទមានមនុស្សសរុបចំនួន ១៤ នាក់ ដោយក្នុងនោះជនជាតិកូរ៉េខាងត្បូង ៨ នាក់ ជនជាតិវៀតណាម ៣ នាក់ និង ជនជាតិឥណ្ឌូនេស៊ីចំនួន ៣ នាក់។

គិតមកទល់ពេលនេះ មានមនុស្សតែ ៤ នាក់ប៉ុណ្ណោះត្រូវបានសង្គ្រោះរួចផុតជីវិត។ ក្រៅពីនេះ ជនរងគ្រោះ ១០ នាក់ទៀត មាន ៤ នាក់ប្រកាសថាស្លាប់ ម្នាក់ទៀតនៅសន្លប់មិនទាន់ដឹងខ្លួន ខណៈ ៥ នាក់ផ្សេងទៀតនៅកំពុងបាត់ខ្លួននៅឡើយ។ ខាងក្រុមសង្គ្រោះជាច្រើនបាននាំគ្នាចុះទៅទីតាំងកើតហេតុដើម្បីធ្វើការស្វែងរកជនរងគ្រោះដែលកំពុងបាត់ខ្លួន បើទោះជាអាកាសធាតុមិនអំណោយផលក៏ដោយ៕

ប្រភព៖ Asia&Pacific