មើមខ្ទឹមគឺជាបន្លែមួយប្រភេទដែលភាគច្រើនមិនថាអ្នកនៅតាមតំបន់អាស៊ី ឬ អឺរ៉ុបនោះទេ មិនងាយនឹងខ្វះ ឬ រំលងនោះឡើយរាល់ពេលដែលចម្អិនម្ហូបអាហារ។ មើមខ្ទឹមមានច្រើនប្រភេទដូចជាខ្ទឹមស ខ្ទឹមក្រហម ឬ ខ្ទឹមបារាំង ដោយប្រភេទនីមួយៗប្រើប្រាស់តាមតម្រូវការមុខម្ហូបផ្សេងៗគ្នា។
បើទោះជាបន្លែប្រភេទនេះត្រូវបានប្រើប្រាស់ក្នុងផ្ទះបាយញឹកញាប់ក៏ពិតមែន ប៉ុន្តែមនុស្សភាគច្រើនតែងតែប្រឈមនឹងបញ្ហាមួយ គឺតែងតែក្រហាយហូរទឹកភ្នែករាល់ពេលដែលបកសម្បក កាត់ ឬ ហាន់វាម្ដងៗ។ ថ្ងៃនេះ «ប្រជាប្រិយ» នឹងមកប្រាប់គន្លឹះងាយៗមួយចំនួនក្នុងការកាត់ខ្ទឹមបានស្រួលមិនក្រហាយឆួលរហូតហៀរទឹកភ្នែក។
១. ដាក់ខ្ទឹមក្នុងទូរទឹកកក
យកខ្ទឹមទៅត្រាំទឹករួចលាងឱ្យស្អាតដាក់ឱ្យស្ងួតទឹក រួចយកទៅដាក់ក្នុងទូរទឹកកករយៈពេល ៣០ នាទី ឬបើប្រញាប់ប្រើប្រាស់ខ្លាំង យកដាក់នៅកន្លែងកក ១៥ នាទី មុនយកវាមកហាន់។ ការធ្វើបែបនេះជួយកាត់បន្ថយសកម្មភាពអង់ហ្ស៊ីមដែលបង្កជាពពួកសារធាតុដែលឱ្យឆួលក្រហាយ។
២. កាត់ឫសខ្ទឹមក្នុងទឹក
ដាក់ត្រាំខ្ទឹមក្នុងទឹកផេះ ឬទឹកអង្ករដើម្បីបំបាត់ក្លិន រួចយកកាំបិតមកកាត់ឫសវាចេញទាំងនៅត្រាំក្នុងទឹក។ ធ្វើបែបនេះមិនធ្វើឱ្យសារធាតុឆួលឡើងមកភ្នែកនោះឡើយ។
៣. ផ្សើមកាំបិត និង ដៃ មុនកាត់ខ្ទឹម
រក្សាកាំបិត និង ដៃរបស់យើងឱ្យនៅសើមមុនកាត់ខ្ទឹម ក៏អាចកាត់បន្ថយការក្រហាយឆួលផងដែរ។
៤. ប្រើប្រាស់កាំបិតមុតស្រួចល្អ
ការប្រើកាំបិតមុតល្អ អាចធ្វើឱ្យកាត់ខ្ទឹមបានលឿន និង ជួយកាត់បន្ថយការក្រហាយដូចគ្នា។
៥. ទំពាអាហារពេលកាត់ខ្ទឹម
ពេលកាត់ខ្ទឹម ហើយទំពាចំណីអាហារបណ្ដើរ អាចធ្វើឱ្យមាត់របស់យើងបន្តបញ្ចេញទឹកមាត់ ហើយទឹកមាត់ទាំងនេះនឹងចូលគ្នាជាមួយឧស្ម័ន propanethiol S-oxide មុនភាយចូលក្នុងភ្នែក ដូច្នេះ វាអាចជួយកាត់បន្ថយភាពក្រហាយហៀរទឹកភ្នែកបាន។
៦. ប្រើប្រាស់ក្រូចឆ្មា ឬទឹកខ្មេះ
លាបក្រូចឆ្មា ឬទឹកខ្មេះលើជ្រុញ និង កាំបិតមុនកាត់ខ្ទឹម អាចជួយបន្ថយសារធាតុក្រហាយបានល្អផងដែរ។
៧. បើកម៉ាស៊ីនបូមផ្សែង (បើសិនជាមាន)
វិធីសាស្ត្រគឺជាវិធីសាស្ត្រដ៏ងាយស្រួល មិង លឿនបំផុតមួយក្នុងការជួយដល់ការកាត់ហាន់ខ្ទឹមបានស្រួលល្អ។
៨. ប្រើអំបិល
រោយអំបិលជុំវិញខ្ទឹមដែលកាត់ហើយ នឹងអាចជួយកាត់បន្ថយក្លិនឆួលពេលដែលបកខ្ទឹមបាន។
៩. ពាក់វ៉ែនតា
វិធីសាស្រ្តចុងក្រោយនេះងាយស្រួលជាងគេបំផុតក្នុងការបញ្ចៀសការក្រហាយភ្នែកពេលដែលបក ឬហាន់ខ្ទឹម៕
ប្រភព៖ VN Express
