ប្រិយមិត្តមួយចំនួនអាចនឹងមានការភ្ញាក់ផ្អើល និង សឹងតែមិននឹកស្មានសោះឡើយថា គ្រាន់តែការប្រើប្រាស់ពាក្យគួរសមប៉ុន្មានម៉ាត់ជាមួយនឹងកម្មវិធី AI អាចធ្វើឱ្យខាងក្រុមហ៊ុនត្រូវចាយប្រាក់ច្រើនសន្ធឹកសន្ធាប់។
ជាក់ស្ដែង កាលពីពេលថ្មីៗកន្លងទៅ លោក Sam Altman ដែលត្រូវជានាយកប្រតិបត្តិក្រុមហ៊ុន OpenAI បានធ្វើការទម្លាយលើបណ្ដាញសង្គមថា ការប្រើប្រាស់ពាក្យគួរសមដូចជា «please» និង «thank you» ទៅកាន់ ChatGPT គឺបានធ្វើឱ្យក្រុមហ៊ុនត្រូវចាយប្រាក់ច្រើនខ្លាំងមែនទែន។
លោក Altman បានឆ្លើយតបទៅអ្នកប្រើប្រាស់បណ្ដាញសង្គម X ម្នាក់ ដែលបង្ហោះសារបែបងឿងឆ្ងល់ថាតើក្រុមហ៊ុន OpenAI ត្រូវខាតបង់ប្រាក់ប៉ុន្មានលើតម្លៃថាមពលអគ្គិសនីពីអ្នកដែលប្រើប្រាស់ពាក្យពេចន៍គួរសមទៅកាន់កម្មវិធី AI របស់ពួកគេ។ ក្នុងនោះ លោក Altman បានតបវិញថា៖ «អាចចំណាយលុយរាប់សិបលានដុល្លារ»។
ទោះជាចំណាយប្រាក់ច្រើនកប់ពពកក្ដី តែបើតាមលោក Kurtis Beavers នាយកខាងក្រុម design ឱ្យ Microsoft Copilot បានបញ្ជាក់ក្នុង Microsoft Worklab memo ថា៖ «ការប្រើប្រាស់ពាក្យគួរសមជាមូលដ្ឋានពេលធ្វើការទំនាក់ទំនងជាមួយ AI គឺជួយបង្កើតនូវលទ្ធផលទទួលបានមកវិញប្រកបដោយការសហការ និង គោរព»។ លោកបានរៀបរាប់ថា AI ជំនាន់ថ្មីគឺដូចជាកញ្ចក់ឆ្លុះបញ្ចាំងនូវកម្រិតនៃភាពមានវិជ្ជាជីវៈ ភាពច្បាស់លាស់ និង លម្អិតក្នុងអ្វីដែលអ្នកផ្ដល់ឱ្យ។ ការប្រើប្រាស់ពាក្យគួរសមជាមួយកម្មវិធី AI មិនត្រឹមតែធានាថាអ្នកទទួលបាននូវពាក្យពេចន៍នៃការគោរពត្រឡប់មកវិញនោះទេ តែវាក៏ជួយឱ្យការឆ្លើយតប និង ដំណើរការរបស់កម្មវិធី AI កាន់តែល្អប្រសើរផងដែរ៕
ប្រភព៖ USA TODAY
