មកទល់ពេលនេះ ករណីស្លាប់របស់តារាសម្ដែងចិន Yu Menglong ដោយសារធ្លាក់ពីលើអគារកាលពីថ្ងៃទី ១១ ខែកញ្ញា ឆ្នាំ ២០២៥ កន្លងទៅ នៅតែជាប្រធានបទក្ដៅគគុកនៅឡើយ មិនថាក្នុងប្រទេសចិន ឬបណ្ដាប្រទេសអាស៊ីមួយចំនួននោះទេ។ បើទោះជាខាងអ្នកនាំពាក្យ Studio របស់ Yu Menglong បានបញ្ជាក់ថា ប៉ូលិសសសន្មត់គឺគ្មានសញ្ញានៃករណីឃាតកម្មលើតារាប្រុសរូបនេះក៏ពិតមែន ប៉ុន្តែបណ្ដាសារព័ត៌មាន ក៏ដូចជាសាធារណជនជាច្រើននៅតែមានការសង្ស័យពីក្រោយមូលហេតុនៃការបាត់បង់ជីវិតភ្លាមៗរបស់ Yu Menglong បែបនេះ។
យ៉ាងណាមិញ មកដល់ថ្ងៃទី ១៥ ខែកញ្ញា ឆ្នាំ ២០២៥ នេះ សារព័ត៌មានចិន Sohu បានបញ្ចេញវីដេអូមួយដែលកំពុងផ្ទុះលើបណ្ដាញសង្គម Weibo ដែលជាវីដេអូសង្ស័យថាថតជាប់សកម្មភាពរបស់ Yu Menglong កំពុងស្រែកយំខ្លាំងៗកណ្ដាលយប់ មុនពេលរូបលោកត្រូវគេប្រទះឃើញស្លាប់នៅលើដី។ គណនីដែលបង្ហោះវីដេអូនោះបានលើកឡើងថា រូបគេបានចែកចាយឃ្លីបវីដេអូនោះច្រើនដងហើយ រួមទាំង Tag គណនីតារាប្រុស Yu Menglong ទៀត ក្រោយដំណឹងមរណភាពរបស់លោកបានប្រកាសជាផ្លូវការ ប៉ុន្តែវីដេអូនោះត្រូវបានលុបចោលដោយកម្មវិធីបណ្ដាញសង្គមមួយចំនួន។
តាមរយៈវីដេអូនោះដែរ អ្នកលេងតាមបណ្ដាញសង្គមជាច្រើនបានចង្អុលបង្ហាញថាទីតាំងបង្អួចដែលថតជាប់ក្នុងវីដេអូគឺពិតជាដូចនឹងទីតាំងដែល Yu Menglong ធ្លាក់ចុះមកពិតមែន។ ជាមួយភស្តុតាងនេះ និង សង្ស័យថា Yu Menglong ត្រូវគេសម្លាប់ មហាជននៅប្រទេសចិនក៏បានស្នើឱ្យប៉ូលិសធ្វើការស៊ើបអង្កេតបន្ថែមជុំវិញករណីនេះ។ ជាមួយគ្នានោះ ខាងសារព័ត៌មានក្នុងប្រទេសចិនក៏បានទាក់ទងទៅខាងនាយកដ្ឋានប៉ូលិស Chaoyang ក្រុងប៉េកាំង ប្រទេសចិន ដើម្បីសួរនាំពាក់ព័ន្ធនឹងវីដេអូមួយនោះ ប៉ុន្តែមិនទទួលបានការឆ្លើយតបអ្វីឡើយ។
គួរឱ្យដឹងផងដែរថា បច្ចុប្បន្ន ក្រៅពីព័ត៌មានប្រកាសផ្លូវការថា តារាសម្ដែងប្រុស Yu Menglong បានទទួលមរណភាព សារព័ត៌មាននានាគឺមិនមានទទួលបានដំណឹង update បន្ថែមផ្លូវការអ្វីទៀតឡើយ ហើយដំណើរការស៊ើបអង្កេតនានា ក៏ខាងអាជ្ញាធរមានភាពស្ងប់ស្ងាត់ដូចគ្នា៕
