កាលពីថ្ងៃទី ០៩ ខែវិច្ឆិកា ឆ្នាំ ២០២៥ កន្លងទៅ មហាជនក៏ដូចជាអ្នកគាំទ្រជាច្រើនបានសម្ដែងការព្រួយបារម្ភជាខ្លាំង ខណៈឃើញតារាចម្រៀងស្រី HyunA ដួលសន្លប់លើឆាក ទាំងរូបនាងកំពុងច្រៀងបទ «Bubble Pop» នៅកម្មវិធី «WATERBOMB Macao» រហូតត្រូវក្រុមការងារបីចុះពីឆាកភ្លាមៗ។
យ៉ាងណាមិញ ក្រោយមកមិនបានប៉ុន្មាន HyunA ក៏បានធ្វើការបង្ហោះលើបណ្ដាញសង្គម IG ផ្ទាល់ខ្លួនរបស់នាង ប្រាប់ពីស្ថានភាពខ្លួនដល់អ្នកគាំទ្រថា រូបនាងមិនអីនោះទេក កុំឱ្យអ្នកគាំទ្របារម្ភទៀតអី។ ជាមួយគ្នានោះដែរ នាងក៏បានធ្វើការសុំទោសដល់អ្នកគាំទ្រនាងទាំងអស់ដែលបានចូលរួមកម្មវិធីផ្ទាល់ ដែលខំចំណាយប្រាក់មកមើលការសម្ដែង តែបែរជាជួបបញ្ហាខកបំណងបែបនេះ។
តាមការរៀបរាប់ទាំងស្រុងរបស់ HyunA មានខ្លឹមសារដូច្នេះថា៖ «ខ្ញុំពិតជាសុំទោសមែនទែន វាមានពេលខើចគិតតាំងពីការសម្ដែងលើកមុន ហើយខ្ញុំចង់បង្ហាញឱ្យលះល្អឱ្យអ្នកទាំងអស់គ្នាមើល ប៉ុន្តែខ្ញុំមានអារម្មណ៍ថាខ្ញុំគ្មានវិជ្ជាជីវៈសោះ។ និយាយការពិតទៅ ខ្ញុំក៏អត់ចាំអ្វីនោះដែរពេលនោះ។
ខ្ញុំព្យាយាមគិតពីវាគ្រប់ច្រក ហើយខ្ញុំពិតជាចង់ប្រាប់អ្នកទាំងអស់គ្នាពីរឿងនេះ។ មានអ្នកគាំទ្រនៅម៉ាកាវជាច្រើនបានមកចូលរួម ហើយពិតណាស់ក៏មាន A-ing (ឈ្មោះអ្នកគាំទ្រ) របស់ពួកយើងដែរ ហើយគ្រប់គ្នាសុទ្ធតែចំណាយប្រាក់មកមើលការប្រគំតន្ត្រីនេះ។ ឱ្យខ្ញុំសុំទោស ហើយពិតជាសុំទោសមែនទែន ម្ដងហើយម្ដងទៀត។
ចាប់ពីពេលនេះទៅ ខ្ញុំនឹងខិតខំពង្រឹងសមត្ថភាព និង បន្តការប្រឹងប្រែងបន្ថែមទៀត។ វាពិតជាល្អខ្លាំងប្រសិនបើគ្រប់យ៉ាងវារលូនទៅដូចអ្វីដែលខ្ញុំចង់បាន ប៉ុន្តែខ្ញុំនឹងព្យាយាមឱ្យអស់ពីសមត្ថភាព។ តាំងពីក្មេងមកដល់ពេលនេះ អ្នកទាំងអស់គ្នាជាអ្នកសរសើរខ្ញុំ គាំទ្រខ្ញុំ និង ស្រឡាញ់ខ្ញុំ ទោះបីជាខ្ញុំមានចំណុចខ្វះខាតក៏ដោយ។ ខ្ញុំអរគុណអ្នកទាំងអស់គ្នាណាស់ ហើយខ្ញុំពិតជាមិនអីនោះទេ កុំបារម្ភពីខ្ញុំអី។ ខ្ញុំសង្ឃឹមថាគ្រប់គ្នាសម្រាកបានស្រួល គេងឱ្យលក់ស្រួលណា»៕
