គិតមកទល់ពេលនេះ លោក Mark Zuckerberg បានចាប់ដៃគ្នាជាមួយ Priscilla Chan រួមរស់ជាប្ដីប្រពន្ធអស់រយៈពេល ១៣ ឆ្នាំហើយ ក្រោយរៀបការជាមួយគ្នាកាលពីឆ្នាំ ២០១២ កន្លងទៅ ដោយទទួលបានចំណងដៃកូនៗចំនួន ៣ នាក់។ ជាការពិតណាស់ បើទោះជាខ្លួនជាបុគ្គលល្បីមានមុខមាត់គេស្គាល់សឹងពេញពិភពលោកក៏ពិតមែន ប៉ុន្តែមេធំ ហ្វេសប៊ុក រូបនេះ កម្របង្ហោះសាររៀបរាប់ពីជីវិតគ្រួសាររបស់លោកតាមបណ្ដាញសង្គមណាស់ ជាពិសេសប្ដីប្រពន្ធមហាសេដ្ឋីមួយគូនេះគឺមិនសូវបានឃើញពោលពាក្យផ្អែមល្ហែមដាក់គ្នាលើបណ្ដាញសង្គមនោះឡើយ។
យ៉ាងណាមិញ ថ្មីៗកន្លងទៅ ពោលនៅថ្ងៃទី ២៤ ខែកុម្ភៈ ឆ្នាំ ២០២៥ ដែលត្រូវជាថ្ងៃកំណើតលោកស្រី Priscilla Chan លោក Mark Zuckerberg ស្រាប់តែឃើញធ្វើការបង្ហោះរូបគូមួយសន្លឹកដ៏កម្រអមដោយពាក្យពេចន៍ជូនពរប្រពន្ធបណ្ដូលចិត្តយ៉ាងផ្អែមល្ហែមមានន័យបំផុត។
នៅពីលើរូបភាពដ៏រ៉ូមេនទិចមួយសន្លឹកនោះ លោក Mark បានសរសេររៀបរាប់ថា៖ «ប្រារព្ធថ្ងៃពិសេសរបស់មនុស្សដ៏សំខាន់បំផុតក្នុងជីវិតរបស់ខ្ញុំ។ អូនជាដៃគូ ជាម្ដាយ និង ជាមិត្តភក្តិដ៏ល្អបំផុត ហើយបងពិតជាមានក្ដីសុខមែនទែនដែលបងបានចាយជីវិតមួយនេះជាមួយអូន»។ ការបង្ហោះពោលពាក្យផ្អែមល្ហែមដ៏កម្ររបស់លោក Mark នេះដែរ ទទួលបានការខមមិនចូលរួមជូនពរគ្រប់ៗគ្នា៕
