ថៃ ផ្ទុះឆ្លងកូវីដខ្លាំង ត្រឹម ៥ ខែ មានអ្នកឆ្លងជាង ៧ ម៉ឺននាក់ និង អ្នកស្លា-ប់ ១៩ នាក់

ករណីឆ្លងកូវីដ-១៩ បានផ្ទុះកើនឡើងខ្លាំងនៅក្នុងប្រទេសថៃ ដោយគិតចន្លោះថ្ងៃទី ០១ ខែមករា មកដល់ថ្ងៃទី ១៤ ខែឧសភា ឆ្នាំ ២០២៥ កន្លងទៅនេះ រកឃើញមានអ្នកឆ្លងសរុបចំនួន ៧១ ០៦៧ នាក់ និង ករណីស្លាប់ចំនួន ១៩ នាក់ នេះបើតាមការបញ្ជាក់ពីខាងនាយកដ្ឋានព័ត៌មានស្ដីពីកូវីដ-១៩ របស់រដ្ឋាភិបាល។

ចំនួនករណីឆ្លងគឺនៅតែបន្តកើនឡើង ជាមួយការរកឃើញករណីផ្ទុះឆ្លងជាចង្កោមសំខាន់ៗចំនួន ២។ ការផ្ទុះឆ្លងខ្លាំងនេះដែរកើតមានឡើងក្រោយរដូវកាលមុនសង្ក្រាន្ត (សប្ដាហ៍ទី ៦) ដោយអំឡុងពេលនោះចំនួនករណីឆ្លងកូវីដគឺកើនឡើងជាលំដាប់។

បើតាមទិន្នន័យពីនាយកដ្ឋានវិទ្យាសាស្ត្រវេជ្ជសាស្ត្រ បានបង្ហាញឱ្យឃើញនូវការកើនឡើងនៃវត្តមានវីរុសកូវីដបំប្លែងខ្លួន Omicron XEC នៅក្នុងប្រទេសថៃ អំឡុងខែមករា និង កុម្ភៈ។ ក្នុងនោះដែរ ខាងអាជ្ញាធរក៏បានអំពាវនាវឱ្យសាធារណជនទាំងអស់មានការប្រុងប្រយ័ត្នខ្លួន តាមដានអាការខ្លួនឯង លាងសម្អាតដៃជាប្រចាំ និង ពាក់ម៉ាស់នៅកន្លែងមានមនុស្សកកកុញ៕

ប្រភព៖ The Nation