នៅរសៀលថ្ងៃទី ២៨ ខែឧសភា ឆ្នាំ ២០២៥ នេះ ខាងស្ថាប័ន Miss Grand International បានចេញលិខិតប្រកាសជាផ្លូវការមួយដោយបញ្ជាក់ច្បាស់ៗថា នាង Rachel Gupta ដែលជាម្ចាស់មកុដ MGI 2024 នឹងត្រូវបញ្ឈប់ពីតំណែងចាប់ពីវេលាប្រកាសនេះតទៅ ក្រោមហេតុផលមួយចំនួន។
ក្នុងលិខិតប្រកាសបានសរសេររៀបរាប់ថា ៖ «សេចក្ដីប្រកាសផ្លូវការ! ស្ថាប័ន Miss Grand International សូមធ្វើការប្រកាសពីការដកតំណែងនាង Rachel Gupta ពីតំណែង Miss Grand International 2024 ជាផ្លូវការពីពេលនេះតទៅ។
ការសម្រេចចិត្តនេះដែរ ធ្វើឡើងក្រោយរូបនាងបរាជ័យក្នុងការបំពេញកាតព្វកិច្ចដែលបានដាក់ឱ្យ ការចូលរួមការងារខាងក្រៅដោយគ្មានការយល់ព្រមពីខាងស្ថាប័ន និង ការបដិសេធរបស់នាងក្នុងការចូលរួមក្នុងការធ្វើដំណើរដែលបានគ្រោងទុកទៅប្រទេស Guatemala។
ជាលទ្ធផល ខាងស្ថាប័នក៏បានសម្រេចធ្វើការដកតំណែងនាងភ្លាមៗបែបនេះ។ នាង Rachel Gupta គឺលែងត្រូវបានអនុញ្ញាតឱ្យប្រើប្រាស់តំណែង ឬ ពាក់មកុដរបស់ Miss Grand International 2024 តទៅទៀតហើយ។ ពួកយើងស្នើឱ្យនាងប្រគល់មកុដត្រឡប់មកការិយាល័យកណ្ដាលរបស់ MGI វិញក្នុងរយៈពេល ៣០ ថ្ងៃ រាប់ចាប់ពីថ្ងៃជូនដំណឹងនេះតទៅ»។
គួរឱ្យដឹងដែរថា មុនការប្រកាសរបស់ស្ថាប័ន MGI នេះ គេក៏បានឃើញនៅលើគណនី IG របស់នាង Rachel Gupta បានបង្ហោះដែរ ទាក់ទងជាមួយការសម្រេចចិត្តលាលែងពីតំណែង Miss Grand International 2024 នេះ ដោយនាងថែមទាំងបានបញ្ជាក់ពីមូលហេតុនៃការលាលែងនេះផងដែរ។
នាង Rachel Gupta បានបង្ហោះឡើងថា ៖ «នាងបានសម្រេចចិត្តលាលែងពីដំណែងបវរកញ្ញា ព្រមទាំងប្រគល់មកុដទៅឱ្យស្ថាប័ន MGI វិញហើយ។ កន្លងមកនាងពិតជាមោទនភាពណាស់ ដែលបានទទួលដំណែងនេះ ហើយក៏សង្ឃឹមនាងអាចនឹងលើកមុខលើកមាត់ប្រទេសរបស់នាង ប៉ុន្តែក្រោយពីបានដំណែងរួច នាងតែងទទួលបានការសន្យាខ្យល់ ទង្វើមិនសមរម្យ និង បរិស្ថានដែល Toxic ដូច្នេះហើយនាងមិនអាចទ្រាំទ្រស្ងាត់តទៅទៀតបាននោះទេ។ ការសម្រេចចិត្តនេះដែរ នាងមិនបានធ្វើតាមអារម្មណ៍ឡើយ ហើយប៉ុន្មានថ្ងៃខាងមុខនេះនាងនឹងចេញវីដេអូនិយាយអំពីការលំបាករបស់នាងទាំងប៉ុន្មាននៅក្នុងដំណើរជាបវរកញ្ញាក្នុងស្ថាប័ន MGI នេះ។ នាងសូមឱ្យមហាជនអ្នកគាំទ្រមេត្តា និង បើកចិត្តទទួលយកការសម្រេចចិត្តរបស់នាងផងដែរ»៕
