គ្រប់ទឹក! ប្រថុយជីវិតចាក់ពិសពស់ចូលខ្លួនជិត ២០ ឆ្នាំ ឥលូវឈាមមានតម្លៃ ត្រូវគេទិញពិសោធធ្វើថ្នាំបន្សាបពិស

ការសិក្សាថ្មីមួយនៅសហរដ្ឋអាមេរិកកំពុងបង្ហាញលទ្ធផលយ៉ាងជោគជ័យលើការបង្កើតសេរ៉ូមមួយដែលអាចបន្សាបពិសរបស់សត្វពស់ចំនួន ១៩ ប្រភេទ ដោយផ្អែកលើអង្គបដិប្រាណទាញចេញពីឈាមរបស់បុរសម្នាក់ដែលហ៊ានប្រថុយជីវិតចាក់ពិសពស់ចូលក្នុងខ្លួនរាប់រយដង។

លោក Tim Friede អ្នកចូលចិត្តសិក្សាលើសត្វពស់នៅរដ្ឋ California សហរដ្ឋអាមេរិក បានធ្វើការចាក់ពិសពីពស់កាចសាហាវច្រើនប្រភេទដូចជាពស់វែក ពស់មេមបា (Mambas) និង ពស់កន្ទុយកណ្ដឹងជាដើម ចូលក្នុងរាងកាយខ្លួនឯងអស់រយៈពេល ១៨ ឆ្នាំ។ ស្ដាប់មើលទៅវាដូចជារឿងឆ្កូតឡប់ ប៉ុន្តែទង្វើរបស់បុរសម្នាក់នេះបានទាក់ទាញចំណាប់អារម្មណ៍ដល់លោក Jacob Glanville អ្នកជំនាញផ្នែកប្រព័ន្ធភាពស៊ាំ និង ជា CEO ក្រុមហ៊ុនជីវបច្ចេកវិទ្យា Centivax។

ក្រោយការចាក់ពិសបញ្ចូលខ្លួន លោក Friede បានបណ្ដុះភាពស៊ាំទៅនឹងសារធាតុ neurotoxins មួយចំនួន។ លោក Glanville ក្រោយមកក៏បានយកសំណាកឈាមពីលោក Friede ទៅពិសោធ ដោយអ្នកវិទ្យាសាស្ត្រក៏បានធ្វើការញែកបានអង្គបដិប្រាណជាក់លាក់ចំនួន ២ ផ្សេងគ្នា។ ពួកគេបានយកអង្គបដិប្រាណទាំងនោះមកផ្សំជាមួយថ្នាំមួយប្រភេទហៅថា Varespladib ហើយក៏បានបង្កើតបានជាសេរ៉ូមថ្មីមួយដែលអាចបន្សាបពិសរបស់សត្វពស់កាចសាហាវចំនួន ១៩ ប្រភេទ។ គួរបញ្ជាក់ដែរថា ការពិសោធនេះគឺបានធ្វើឡើងលើសត្វកណ្ដុរ មិនទាន់មានការសាកល្បងលើមនុស្សពិតនៅឡើយទេ។

ជាក់ស្ដែង ក្នុងការតេស្តពិសោធ ថ្នាំដែលផ្សំបានខាងលើគឺជួយឱ្យសត្វកណ្ដុររស់រានបាន ១០០% ពីពិសនៃពស់ចំនួន ១៣ ប្រភេទ ហើយក៏បានផ្ដល់ជាការការពារមួយផ្នែក (ចន្លោះ ២០% ទៅ ៤០%) ប្រឆាំងនឹងពិសសត្វពស់ចំនួន ៦ ប្រភេទផ្សេងទៀត។ បើទោះជាថ្នាំនេះមិនទាន់បានសាកល្បងលើមនុស្សក៏ពិតមែន ប៉ុន្តែអ្នកជំនាញលើកឡើងថា ថ្នាំថ្មីនេះអាចកាត់បន្ថយផលប៉ះពាល់មួយផ្នែកធំបើធៀបទៅនឹងសេរ៉ូមបុរាណដែលទាញយកពីឈាមសត្វសេះ ដែលងាយនឹងអាចបង្កជាប្រតិកម្មអាឡែកហ្ស៊ីបាន។

គួរឱ្យដឹងថា លោក Tim Friede បានបញ្ឈប់ការចាក់ពិសពស់ចូលរាងកាយរបស់លោកហើយតាំងពីឆ្នាំ ២០១៨ មក ដោយបច្ចុប្បន្នលោកកំពុងបំពេញការងារជាមួយក្រុមហ៊ុន Centivax។ ក្រុមអ្នកស្រាវជ្រាវបាននិយាយថា ពួកគេនៅបន្តបង្កើតសេរ៉ូមប្រឆាំងនឹងក្រុមពស់ពិស viperidae ដែលជាក្រុមពស់ពិសមួយក្រុមចំណោមគ្រួសារពស់ពិសធំៗ ២៕

ប្រភព៖ Kenh14