កាលពីថ្ងៃទី ០៨ ខែមិថុនា ឆ្នាំ ២០២៥ កន្លងទៅ សារព័ត៌មាន Air Mail បានចេញផ្សាយអត្ថបទមួយបកអាក្រាតថា តារាសម្ដែងប្រុសដ៏ល្បី Jared Leto ត្រូវបានស្ត្រី ៩ នាក់ចោទប្រកាន់ថាលោកមានទង្វើមិនសមរម្យបំពានលើមនុស្សស្រី និង តាមប្រមាញ់លើក្មេងស្រីមិនទាន់គ្រប់អាយុ។
គួរឱ្យដឹងថា រឿងអាស្រូវពាក់ព័ន្ធនឹងតារាប្រុស Jared Leto គឺត្រូវបាន DJ ស្រីម្នាក់ឈ្មោះ Allie Teliz ទម្លាយម្ដងរួចមកហើយលើបណ្ដាញសង្គមហ្វេសប៊ុកកាលពីឆ្នាំ ២០១២ ប៉ុន្តែពេលនោះមិនមាននរណាម្នាក់ចាប់អារម្មណ៍ឡើយ។ យ៉ាងណាមិញ ឥលូវនេះ នាងបានមកចែករំលែកការបង្ហោះនោះជាថ្មីលើ Story IG របស់នាង។ Allie Teliz បានទម្លាយថា៖ «ខ្ញុំត្រូវបានគេបំពាន និង រងការភ័យខ្លាចដោយអាប្រុសម្នាក់នេះពេលខ្ញុំអាយុ ១៧ ឆ្នាំ»។ DJ ស្រីរូបនេះបានទម្លាយទៀតថា Jared Leto ដឹងថាពេលនោះនាងមានអាយុប៉ុណ្ណាតែរូបគេមិនខ្វល់ឡើយ នាងបានសរសេររៀបរាប់ទៀតថា៖ «អ្វីដែលគេបានធ្វើគឺជាការប្រមាញ់គួរឱ្យខ្លាច និង មិនអាចទទួលយកបានឡើយ»។
DJ Allie Teliz
ក្នុងនោះដែរ មនុស្សស្រីម្នាក់ទៀតក៏បានចេញមកអះអាងថា Jared Leto បានសំដៅទៅរកនាងក្នុងហាងកាហ្វេ Urth Caff កាលពីឆ្នាំ ២០០៦ ពេលដែលនាងមានអាយុត្រឹម ១៦ ឆ្នាំ។ ពេលនោះដែរ Jared Leto គឺទៅជាមួយមិត្តស្រីរបស់គេ Ashley Olsen តែរូបគេបែរជាចាប់ដៃនាង ពេលដែលនាងងើបទៅបន្ទប់ទឹក។ ពួកគេជជែកជាមួយគ្នាមួយស្របក់ហើយក៏ឱ្យលេខទូរស័ព្ទទៅគ្នា។ ប៉ុន្មានថ្ងៃក្រោយមក តួ Joker ក្នុងរឿង «Suicide Squad» រូបនេះក៏បានទាក់ទងទៅនាង ហើយពួកគេក៏បាននិយាយគ្នាពីប្រធានបទដែលមិសមរម្យ ដោយ Jared Leto សួរនាងពីសំណួរដែលពាក់ព័ន្ធនឹងរឿងផ្លូវភេទ។
ដោយឡែក ម៉ូដែលស្រី Laura La Rue ក៏បានចេញមកបកអាក្រាតពីបទពិសោធស្រដៀងគ្នាដែលនាងមានជាមួយ Jared Leto កាលពីឆ្នាំ ២០០៨ ផងដែរ។ នៅពេលនោះ Laura គឺមានវ័យ ១៦ ឆ្នាំ ខណៈ Jared Leto មានអាយុ ៣៦ ឆ្នាំ។ ពួកគេបានជួបគ្នានៅកម្មវិធី animal rights fundraising ដោយ Jared បានសួរអាយុ Laura មុន ហើយពេលដឹងថានាងមានអាយុ ១៦ ឆ្នាំ លោកនៅតែបន្តសុំលេខទូរស័ព្ទនាង និង ផ្ញើសារញ៉ែនាងរហូត។ មកដល់ខែមេសា ឆ្នាំ ២០០៩ Laura បានទៅលេងផ្ទះរបស់ Jared Leto នៅ Los Angeles សហរដ្ឋអាមេរិក។ អ្នកតំណាងឱ្យ Jared Leto និយាយថា ការសន្ទនារបស់ពួកគេទាំងពីរគឺមិនមែនពាក់ព័ន្ធនឹងផ្លូវភេទអ្វីឡើយ និង ថែមលើកឡើងថា Laura បានដាក់ពាក្យធ្វើជាជំនួយការផ្ទាល់ខ្លួនរបស់ Jared Leto ប៉ុន្តែជាការឆ្លើយតប ខាងតារាម៉ូដែលស្រីរូបនេះបានបដិសេធថានាងមិនបានដាក់ពាក្យធ្វើជាជំនួយការផ្ទាល់ខ្លួនរបស់ Jared Leto ឡើយ។
ម៉ូដែល Laura La Rue
ការចោទប្រកាន់គឺបន្តទម្លាយពីស្ត្រីទី ៤ ទី ៥ ដល់ទី ៩ ដោយការលើកឡើងពីបទពិសោធដែលពួកគេធ្លាប់បានជួបគឺស្រដៀងៗគ្នា។ គួរបញ្ជាក់ដែរថា បើទោះជាមានការចោទប្រកាន់មួយចំនួនធំបែបនេះក៏ដោយ ប៉ុន្តែខាងអ្នកតំណាងឱ្យតារាសម្ដែង Jared Leto បានធ្វើការបដិសេធរាល់ការចោទប្រកាន់នោះទាំងអស់៕
ប្រភព៖ Kenh14
