គិតត្រឹមរសៀលថ្ងៃទី ៣១ ខែកក្កដា ឆ្នាំ ២០២៥ កន្លងទៅ ចំនួនអ្នកស្លាប់ដោយគ្រោះទឹកជំនន់នៅក្រុងប៉េកាំង ប្រទេសចិន បានកើនដល់ ៤៤ នាក់ហើយ ខណៈ ៩ នាក់កំពុងបាត់ខ្លួននៅឡើយ។ តាមព័ត៌មានបានឱ្យដឹងថា ជនរងគ្រោះដែលស្លាប់ភាគច្រើនគឺជាមនុស្សវ័យចំណាស់ រស់នៅក្នុងមណ្ឌលចាស់ជរា។
ជាក់ស្ដែង តាមរបាយការណ៍ពីខាងអាជ្ញាធរចិន មនុស្សវ័យចំណាស់ចំនួន ៣១ នាក់បានបាត់បង់ជីវិតនាមណ្ឌលថែទាំចាស់ជរា Taishitun ក្នុងសង្កាត់ Miyun ជិះប្រមាណជា ៩០ នាទីពីក្រុងប៉េកាំងទៅ។ ទីតាំងនេះដែរ គឺជាទីតាំងមួយក្នុងចំណោមកន្លែងដែលរងការវាយប្រហារដោយទឹកជំនន់ខ្លាំងក្លាជាងគេ។
គួរឱ្យដឹងថា មណ្ឌលចាស់ជរាខាងលើ តាំងពីដើមឡើយមកគឺតែងតែជាកន្លែងដែលសុវត្ថិភាពបំផុត ទើបមិនត្រូវបានរាប់បញ្ចូលក្នុងគម្រោងត្រៀមការពារគ្រោះទឹកជំនន់។ យ៉ាងណាមិញ ក្រោយរឿងអាក្រក់បានកើតឡើង អាជ្ញាធរក្នុងតំបន់ក៏បានសម្ដែងការសោកស្ដាយ និង ហៅរឿងនេះថាជាមេរៀនមួយដ៏ជូរចត់បំផុត។
គួរបញ្ជាក់ថា មណ្ឌលចាស់ជរាខាងលើមានមនុស្សចាស់ស្នាក់នៅសរុប ៦៩ នាក់ ក្នុងនោះ ៥៥ នាក់មានពិការភាព។ ក្នុងពេលជួបគ្រោះទឹកជំនន់នោះដែរ នៅមណ្ឌលមានមនុស្សសរុប ៧៧ នាក់ រួមទាំងគ្រូពេទ្រថែទាំ។ យ៉ាងណាមិញ ជាអកុសល ជនរងគ្រោះជាច្រើនគឺមិនអាចគេចខ្លួនទាន់ពេលវេលាឡើយដោយសារតែជំនន់ទឹកភ្លៀងហូរបុកមកលឿនពេក៕
