តារាសម្ដែងស្រីតៃវ៉ាន់ដ៏ល្បី Barbie Hsu ដែលមហាជនខ្មែរភាគច្រើនស្គាល់ច្បាស់ជាតួអង្គ «សាន់ឆាយ» ក្នុងរឿង F4 នោះ បានទទួលមរណភាពហើយនៅប្រទេសជប៉ុនក្នុងវ័យ ៤៨ ឆ្នាំ ដោយសារជំងឺផ្ដាសាយ និង រលាកសួត។
តាមការចេញផ្សាយដោយសារព័ត៌មាន Next Apple នៅថ្ងៃទី ០៣ ខែកុម្ភៈ ឆ្នាំ ២០២៥ នេះ ប្អូនស្រីរបស់ Barbie បានប្រកាសដំណឹងរន្ធត់នេះដោយនិយាយថា បងស្រីរបស់នាងបានទទួលមរណភាពភ្លាមៗនៅប្រទេសជប៉ុន។ ប្អូនស្រីតារាស្រីរូបនេះបានរៀបរាប់ថា៖ «អរគុណអ្នករាល់គ្នាចំពោះក្ដីបារម្ភ។ អំឡុងពេលចូលឆ្នាំថ្មីនេះ ក្រុមគ្រួសារយើងបានទៅដើរលេងកម្សាន្តនៅប្រទេសជប៉ុន។ បងស្រីដ៏ល្អរបស់ខ្ញុំ ដោយសារតែឆ្លងរោគផ្ដាសាយ និង រលាកសួត គាត់ក៏បានចាកចេញពីយើងទៅ។ ខ្ញុំពិតជាដឹងគុណមែនទែនដែលមានបងជាបងស្រីក្នុងជាតិនេះ មើលថែប្អូន និង ជាដៃគូដ៏ល្អរបស់ប្អូន។ ខ្ញុំនឹងនៅតែដឹងគុណបងស្រី និង នៅតែចងចាំបងស្រីជារៀងរហូត»។
ដំណឹងមរភាពភ្លាមៗនៃតារាស្រីរូបនេះ ត្រូវបានប្រកាសដោយសាច់ញាតិរបស់នាង ខណៈលោក Wang Xiaofei ដែលជាអតីតប្ដីរបស់នាងក៏បានផ្លាស់ប្ដូររូប profile ទៅជា background ពណ៌ខ្មៅផងដែរ។ ដំណឹងដ៏តក់ស្លុតមួយនេះបានធ្វើឱ្យមហាជនក៏ដូចជាអ្នកគាំទ្ររបស់នាងជាច្រើនសឹងតែមិនអាចទទួលយកបាន និង បាននាំគ្នាផ្ញើសាររំលែកទុក្ខព្រោងព្រាត៕
