នៅថ្ងៃទី ២៧ ខែវិច្ឆិកា ឆ្នាំ ២០២៥ កន្លងទៅថ្មីៗនេះ ក្រសួងព័ត៌មាន បានចេញសេចក្ដីប្រកាសស្ដីពីលក្ខខណ្ឌគុណវុឌ្ឍិ និង វិជ្ជាជីវៈសារព័ត៌មានសម្រាប់អ្នកអនុវត្តសកម្មភាពក្នុងវិស័យព័ត៌មាន និង សោតទស្សន៍ ក្នុងគោលបំណងដើម្បីកំណត់អំពីលក្ខខណ្ឌគុណវុឌ្ឍិ និង វិជ្ជាជីវៈសារព័ត៌មានសម្រាប់អ្នកអនុវត្តសកម្មភាពក្នុងវិស័យព័ត៌មាន និង សោតទស្សន៍ ដើម្បីពង្រឹងសណ្ដាប់ធ្នាប់សារព័ត៌មាន លើកកម្ពស់វិជ្ជាជីវៈសារព័ត៌មាន និង ពង្រឹងគុណភាពព័ត៌មាន សុវត្ថិភាពព័ត៌មានសម្រាប់សាធារណជន។
យោងតាមសេចក្ដីប្រកាសរបស់ក្រសួងព័ត៌មាន នៅជំពូកទី ២ ត្រង់ចំណុច ២.៤ សម្រាប់អ្នកសារព័ត៌មានគ្មានអង្គភាព អ្នកផលិតមាតិកា និង អ្នកមានប្រជាប្រិយភាព គឺតម្រូវឱ្យមានអាយុចាប់ពី ២០ ឆ្នាំឡើងទៅ និង ត្រូវមានសញ្ញាបត្របរិញ្ញាបត្រ និង សញ្ញាបត្រដែលមាតម្លៃសមមូលឡើងទៅ។ បន្ថែមពីនេះ ក៏ត្រូវបានវិញ្ញាបនបត្របញ្ជាក់ការសិក្សាវិជ្ជាជីវៈសារព័ត៌មាន និង សោតទស្សន៍ ពីក្រសួងព័ត៌មាន ឬស្ថាប័នដែលមានការទទួលស្គាល់ដោយក្រសួងព័ត៌មាន។
ជាមួយគ្នានោះដែរ ក្នុងសេចក្ដីប្រកាសក៏បានកំណត់ឱ្យបុគ្គលរៀបរាប់ខាងលើ មានបទពិសោធធ្លាប់បម្រើការងារជាអ្នកយកព័ត៌មានយ៉ាងតិច ១ ឆ្នាំ ដែលមានលិខិតបញ្ជាក់ទទួលស្គាល់ពីសាមីអង្គភាពដែលខ្លួនសរសេរអត្ថបទផ្សាយ ឬកិច្ចសន្យាការងារចុងក្រោយ។ ធ្លាប់សរសេរអត្ថបទឱ្យអង្គភាពសារព័ត៌មានយ៉ាងតិចចំនួន ៣។ ត្រូវមានលិខិតបញ្ជាក់ទីកន្លែងរស់នៅ និង កិរិយាមារយាទពីឃុំ-សង្កាត់។ ត្រូវមានលិខិតបញ្ជាក់សុខភាពផ្លូវការ និង មិនធ្លាប់មានការតវ៉ាជាអាទិ៍លើអត្ថបទ ឬវីដេអូ ឬរូបភាព ឬវប្បធម៌ ឬក្បួនខ្នាតអក្សរសាស្ត្រ និង ភាសាជាតិខ្មែរ ដែលរំលោភទៅលើក្រមសីលធម៌វិជ្ជាជីវៈ៕
សូមអានសេចក្ដីលម្អិតខាងក្រោម៖
