ថ្មីៗកន្លងទៅនេះ តារាសម្ដែងស្រី Katy Kung ត្រូវបានមហាជនប្រទះឃើញនៅឯទីលានប្រណាំងសេះមួយកន្លែងជាមួយនឹងអ្នកកាសែតហុងកុងម្នាក់ឈ្មោះ Icy Wong។ Katy មើលទៅរួសរាយណាស់ ដោយនាងថែមទាំងលើកដៃគ្រវីតបដាក់គ្រប់គ្នាទៀតផងក្រោយឃើញពួកគេថតរូបរបស់នាង។
យ៉ាងណាមិញ វត្តមានរបស់នាងនៅទីលានប្រណាំងសេះនេះដែរគឺបានក្លាយជារឿងវែកញែកដ៏ក្ដៅគគុកពីសំណាក់មហាជននៅហុងកុង ដោយខ្លះបានលើកឡើងថា ពួកគេបានឃើញ Katy នៅទីលាននោះជាច្រើនដងណាស់នៅពេលថ្មីៗនេះ ហើយវត្តមានញឹកញាប់របស់នាងនេះហាក់បង្ហាញថានាងគឺមិនមានការងារធ្វើច្រើនទេមើលទៅពេលនេះ។ អ្វីដែលធ្ងន់ជាងនេះទៅទៀត គឺនៅពេលមានមហាជនខ្លះបានចោទតារាស្រីវ័យ ៣៥ ឆ្នាំរូបនេះថា ទៅទីលានប្រណាំងសេះញឹកញាប់បែបនេះក៏ព្រោះតែនាងព្យាយាមតាមប្រមាញ់ចង់បានប្ដីអ្នកមាន ព្រោះឥលូវអាជីពរបស់នាងកំពុងធ្លាក់ចុះខ្លាំង។
ជាការពិតណាស់ ក្នុងរយៈពេលប៉ុន្មានខែមកនេះ ការងារជាតារាសម្ដែងរបស់ Katy គឺមិនឡើងខ្លាំងនោះឡើយ បើទោះបីជានាងឈ្នះពានរង្វាន់តារាសម្ដែងស្រីឆ្នើមនៅកម្មវិធី TVB Anniversary Awards កាលពីឆ្នាំទៅក៏ដោយ។ តាមការឱ្យដឹង រយៈពេល ៨ ខែមកហើយដែលនាងមិនបានសម្ដែងសោះ។
យ៉ាងណាមិញ ឆ្លើយតបនឹងការចោទប្រកាន់របស់មហាជនថានាងកំពុងតាមប្រមាញ់រកប្ដីជាអ្នកមាន Katy បានឆ្លើយបកស្រាយប្រាប់សារព័ត៌មានហុងកុង HKO1 ថា នាងទៅទីលានប្រណាំងសេះនោះគឺដើម្បីគាំទ្រមិត្តសំឡាញ់របស់នាង Icy និង ប្ដីគេ តែប៉ុណ្ណោះ។ នាងបានរៀបរាប់ទៀតថា នាងធ្លាប់សន្យាជាមួយមិត្តភក្តិថានឹងទៅជួយគាំទ្រដោយផ្ទាល់នៅពេលណាដែលនាងទំនេរ។
ជាមួយគ្នានោះដែរ Katy ក៏បានបដិសេធការចោទប្រកាន់ថានាងទៅទីនោះដើម្បីរកប្ដីអ្នកមាន។ ពេលអ្នកកាសែតសួរនាងថា Icy មានព្យាយាមណែនាំបុរសណាម្នាក់ឱ្យនាងទេ? Katy ក៏តបវិញថា៖ «នាងមិនដែលទេ ពួកយើងកម្រនិយាយពីរឿងបែបនេះណាស់»។ Katy បន្ថែមថា ចំពោះរឿងទំនាក់ទំនងស្នេហាអីហ្នឹងគឺនាងមិនដែលខ្វល់ខ្វាយឡើយឥលូវនេះ ហើយនាងក៏បានទាន់បង្ខំចង់រៀបការនោះទេខណៈនាងនៅផ្ដោតសំខាន់លើការងាររបស់ខ្លួនឯងសិន។
មួយវិញទៀត Katy ក៏បានសង្កត់បញ្ជាក់ដែរថា បើទោះជាឥលូវនាងមិនទាន់មានរឿងសម្ដែងណាមួយថតពិតមែន ប៉ុន្តែនាងក៏មានឱកាសការងារមិនតិចនោះដែរចាប់តាំងពីនាងឈ្នះពាន Best Actress កាលពីឆ្នាំ ២០២៤ មកនោះ។ នាងនិយាយថា នាងពិតជារីករាយណាស់ដែលទទួលបានការគាំទ្រពីប្រេន និង clients ជាច្រើន ក្រោយឈ្នះពានរង្វាន់ ហើយនាងក៏កំពុងប្រើប្រាស់ពេលវេលាដែលខ្លួនឯងកំពុងមាន មុនចាប់ផ្ដើមការងារថ្មីរកលុយបន្ថែម៕
ប្រភព៖ 8days
