ហេតុការណ៍គ្រោះថ្នាក់កើតមានឡើងញឹកញាប់លើយន្តហោះដឹកដំណើរ បានបង្កជាការព្រួយបារម្ភ ភ័យខ្លាចដល់ពលរដ្ឋកូរ៉េខាងត្បូងជាច្រើនរហូតបាក់ស្បាតលែងចង់កក់សំបុត្រយន្តហោះ។
ជាក់ស្ដែង កាលពីយប់ថ្ងៃទី ២៨ ខែមករា ឆ្នាំ ២០២៥ កន្លងទៅថ្មីៗនេះ យន្តហោះមួយគ្រឿងទៀតហើយរបស់កូរ៉េ Air Busan Airbus A321 បានកើតមានអគ្គិភ័យឆាបឆេះយ៉ាងសន្ធោសន្ធៅខណៈរៀបហោះចេញពីព្រលានយន្តហោះអន្តរជាតិ Gimhae។ ជាសំណាងល្អ អ្នកដំណើរ និង បុគ្គលិកសរុបទាំង ១៧៦ នាក់លើនោះត្រូវបានជម្លៀសចេញទាន់ដោយសុវត្ថិភាព ដោយមានមនុស្ស ៧ នាក់ប៉ុណ្ណោះរងរបួសតិចតួច។
ទោះបីជាហេតុការណ៍មួយនេះមិនបង្កឱ្យមានគ្រោះថ្នាក់ដល់អាយុជីវិតអ្នកដំណើរក៏ដោយ ប៉ុន្តែពលរដ្ឋកូរ៉េខាងត្បូងជាច្រើននៅតែខ្លាចបាក់ស្បាតខ្លាំងពីហេតុការណ៍បុកឆេះយន្តហោះ Jeju Air ដែលឆក់យកអាយុជីវិតមនុស្ស ១៧៨ នាក់កាលពីថ្ងៃទី ២៩ ខែធ្នូ ឆ្នាំ ២០២៤ កន្លងទៅនៅឡើយ។ ភាពភ័យខ្លាចនេះដែរ បានធ្វើឱ្យមនុស្សជាច្រើនលែងហ៊ានចង់ជិះយន្តហោះតទៅទៀត ខណៈមួយចំនួនទៀតដែលទិញសំបុត្រហើយនោះក៏ពិចារណាចង់លុបចោលវិញផងដែរ។
ដូចករណីរបស់បុរសវ័យ ៥៩ ឆ្នាំ ឈ្មោះ Seo នេះ លោកមានគម្រោងនាំក្រុមគ្រួសារទៅលេងប្រទេសជប៉ុននៅខែក្រោយ ប៉ុន្តែឥលូវលោកសម្រេចចិត្តលុបចោលការហោះហើរវិញ ដោយសារក្ដីបារម្ភពីសុវត្ថិភាព សុខចិត្តចោលលុយថ្លៃសំបុត្រជាង ៧០០$។ ថ្លែងប្រាប់នៅថ្ងៃទី ៣១ ខែមករា ឆ្នាំ ២០២៥ នេះ លោក Seo បានរៀបរាប់ថា៖ «គ្រោះថ្នាក់ធ្លាក់យន្តហោះគឺវាកម្រនឹងកើតមានណាស់ តែឥលូវខ្ញុំមានអារម្មណ៍ថាវាកើតឡើងញឹកដល់ហើយ។ ដូច្នេះ វាមិនធានានោះឡើយថាក្រុមគ្រួសារខ្ញុំអាចមានសុវត្ថិភាពមិនប៉ះពាល់នោះ»។
ស្របពេលពលរដ្ឋបារម្ភពីសុវត្ថិភាពធ្វើដំណើរតាមយន្តហោះ ខាងក្រសួងដែនដី ហេដ្ឋារចនាសម្ព័ន្ធ និង ដឹកជញ្ជូនប្រចាំប្រទេសកូរ៉េ ក៏បានលើកឡើងដែថា ចំនួនអ្នកដំណើរកក់សំបុត្រយន្តហោះគឺបានធ្លាក់ចុះគួរឱ្យកត់សម្គាល់ក្នុងពេលប៉ុន្មានសប្ដាហ៍ក្រោយមានហេតុការណ៍បុកយន្តហោះ Jeju Air។ មួយវិញទៀត ដំណើរស៊ើបអង្កេតយឺតយ៉ាវរកមូលហេតុបង្កគ្រោះថ្នាក់ក៏ជាកត្តាធ្វើឱ្យពលរដ្ឋព្រួយបារម្ភដូចគ្នា។
ជាក់ស្ដែង ដូចករណីយន្តហោះ Jeju Air រយៈពេលជាងមួយខែហើយខាងអាជ្ញាធរនៅមិនទាន់បញ្ជាក់ពីមូលហេតុបង្កពិតប្រាកដបាននៅឡើយ ហើយចំពោះយន្តហោះ Air Busan ដែលឆាបឆេះថ្មីៗកន្លងទៅនេះវិញ មូលហេតុបឋមគេជឿថាបណ្ដាលមកពីការផ្ទុះថ្មពីក្នុងវ៉ាលិសរបស់អ្នកដំណើរ តែនៅតែមិនទាន់ច្បាស់ផ្លូវការដូចគ្នា៕
ប្រភព៖ VN Express
