នាង Opal Suchata Chuangsri ជនជាតិថៃ ដែលបានឈ្នះមកុដ Miss World ឆ្នាំ 2025 ដំបូងឱ្យប្រទេសថៃ បានវិលត្រឡប់មកកាន់ស្រុកកំណើតរបស់ខ្លួនវិញបានជាង ១ សប្ដាហ៍ហើយ ប៉ុន្តែវត្តមានរបស់នាងនៅតែបន្តទទួលបានការចាប់អារម្មណ៍ខ្លាំងពីសំណាក់មហាជនអ្នកគាំទ្រវិស័យបវរកញ្ញា រួមទាំងអ្នកសារព័ត៌មានក្នុងស្រុកជាច្រើន។
ជាក់ស្ដែង កាលពីថ្ងៃទី ១៧ ខែមិថុនា ឆ្នាំ ២០២៥ កន្លងទៅ បវរកញ្ញាម្ចាស់មកុដ Miss World 2025 ដែលជានិស្សិតផ្នែកវិទ្យាសាស្ត្រនយោបាយមកពីមហាវិទ្យាល័យ Thammasat រូបនេះ បានជួបជាមួយនាយករដ្ឋមន្ត្រីថៃ លោកស្រី Paetongtarn Shinawatra នាវិមានរដ្ឋាភិបាល ស្របពេលដែលនាយករដ្ឋមន្ត្រីខ្លួនកំពុងប្រឈមបញ្ហានយោបាយទាំងក្នុងស្រុក និង ក្រៅស្រុក។
នាង Opal បាននិយាយថា នាងយល់ពីបញ្ហាប្រឈមក្នុងការកាន់តំណែងដ៏ធំមួយនេះ ដូច្នេះនាងចង់ផ្ដល់ការលើកទឹកចិត្តក្នុងនាមជាស្ត្រីដូចគ្នាទៅកាន់នាយករដ្ឋមន្ត្រីខ្លួនក្នុងការបន្តកិច្ចការងារដើម្បីប្រទេសជាតិ។ យ៉ាងណាមិញ ក្នុងពេលជាមួយគ្នានោះដែរ Miss World 2025 នាង Opal ក៏ត្រូវបានខាងទូរទស្សន៍មួយចោទសួរជាសំណួរទៅនាងជុំវិញបញ្ហាជម្លោះព្រំដែនដ៏ក្ដៅគគុករវាងប្រទេសថៃ និង កម្ពុជា ហើយការឆ្លើយតបប្រកបដោយចំណេះដឹងរបស់នាងទទួលបានការចាប់អារម្មណ៍ខ្លាំងផងដែរ។
នាង Opal បាននិយាយថា ៖ «ក្នុងនាមជា Miss World ខ្ញុំគឺតំណាងឱ្យមនុស្សគ្រប់គ្នាទាំងអស់មិនថានរណាជានរណានោះឡើយ។ អ្វីដែលយើងអាចធ្វើបានគឺគាំទ្រលើកទឹកចិត្តឱ្យមានការសន្ទនាគ្នាដោយសន្តិភាពដែលយកអាយុជីវិតមនុស្សជាចម្បង ជាពិសេសសុវត្ថិភាពរបស់ក្មេងៗ»។
បវរកញ្ញាពិភពលោកឆ្នាំ ២០២៥ រូបនេះបានបញ្ជាក់បន្ថែមពីសារសំខាន់នៃការយោគយល់ និង ការយល់ដឹងពីគ្នាក្នុងការដោះស្រាយជម្លោះ ទោះជាជម្លោះក្នុងស្រុក ឬ ក្រៅស្រុកក៏ដោយ។ នាងបានបន្ថែមថា ៖ «ពួកយើងអាចប្រើប្រាស់បញ្ញា និង ការយល់ដឹងក្នុងការពិភាក្សាពីអ្វីដែលបង្កជាបញ្ហា និង ធ្វើការស្វែងរកដំណោះស្រាយរួមគ្នា»៕
ប្រភព៖ Khaosod English
