ជារឿងដ៏ភ្ញាក់ផ្អើល និង រំភើបខ្លាំងមួយសម្រាប់អ្នកលេងបណ្ដាញសង្គមនានាលើសកលលោក ដោយកំពូលតារាចម្រៀង Taylor Swift បានធ្វើការប្រកាសជាសាធារណៈថា រូបនាង និង គូស្នេហ៍ Travis Kelce បានភ្ជាប់ពាក្យប្ដូរឈ្មោះមកជាគូដណ្ដឹង និង ត្រៀមដឹកដៃគ្នាចូលរោងការហើយ។
តាមរយៈការបង្ហោះរបស់ Taylor Swift លើបណ្ដាញសង្គម IG របស់នាង បង្ហាញរូបភាពដ៏រ៉ូមេនទិចច្រើនសន្លឹកនៅពេល Travis Kelce សុំនាងរៀបការកណ្ដាលសួនផ្កាដ៏ស្រស់ស្អាតជាមួយនឹងចិញ្ចៀនពេជ្រមួយវង់ដ៏ធំ អមដោយសារដ៏មានន័យផ្អែមល្ហែមថា៖ «គ្រូបង្រៀនអង់គ្លេស និង គ្រូបង្រៀនកីឡារបស់អ្នកទាំងអស់គ្នានឹងរៀបការហើយ»។
ដំណឹងដ៏ភ្ញាក់ផ្អើលមួយនេះ ប្រកាសមិនដល់ ៣០ នាទីផង មានអ្នកចូល like ជាង ២ លាននាក់។ អ្នកគាំទ្រជុំវិញពិភពលោកបាននាំគ្នាបង្ហាញក្ដីរំភើប និង អបអរជូនពរ Taylor Swift និង Travis Kelce ព្រោងព្រាត ដោយទីបំផុត Taylor រកបានគូជីវិតពោរពេញដោយក្ដីសុខ សុភមង្គលហើយ៕
