ប្ដីចិត្តធម៌គ្មានពីរក្នុងលោក! ដឹងប្រពន្ធលួចសហាយស្មន់ជាមួយអ្នកជិតខាង បែរជាមិនខឹងហើយថែមរៀបចំមង្គលការឱ្យទៀត

ថ្មីៗនេះសារព័ត៌មានឥណ្ឌាមួយបានចេញផ្សាយករណីដ៏ប្លែកកម្រមាន ដោយបុរសម្នាក់រកឃើញថាប្រពន្ធរបស់ខ្លួនលួចសហាយស្មន់ជាមួយនឹងអ្នកជិតខាង តែបែរមិនខឹងហើយថែមសម្រេចចិត្តធ្វើរឿងមួយដល់សហាយស្មន់ទាំងគូនោះទៀត។

តាមព័ត៌មានបានឱ្យដឹងថា ហេតុការណ៍ខាងលើកើតឡើងកាលពីថ្ងៃទី ២៤ ខែមេសា ឆ្នាំ ២០២៥ កន្លងទៅ ដោយមានបុរសជនជាតិឥណ្ឌាម្នាក់បានសម្រេចចិត្តរៀបចំពិធីមង្គលការឱ្យប្រពន្ធរបស់ខ្លួនជាមួយអ្នកជិតខាងដែលជាអ្នកលក់បន្លែ ក្រោយពួកគេទាំងពីរលួចបង្កាត់ភ្លើងស្នេហ៍ជាមួយគ្នា។

បុរសជាប្ដីចិត្តធម៌មានឈ្មោះ Nayan Saha អាយុ ៣៣ ឆ្នាំ រស់នៅសង្កាត់ South Tripura ប្រទេសឥណ្ឌា។ លោក Saha និង ប្រពន្ធរបស់លោកបានរួមរស់ជាមួយគ្នារយៈពេល ៨ ឆ្នាំហើយ ដោយទើបតែថ្មីៗកន្លងទៅនេះ លោកបានរកឃើញថាប្រពន្ធខ្លួនលួចទាក់ទងជាមួយអ្នកជិតខាង។

លោកបានសុំប្រពន្ធជាច្រើនលើកច្រើនដងឱ្យឈប់ទំនាក់ទំនងនោះទៅ ប៉ុន្តែនាងនៅតែបន្តទៅជួបគូកំណាន់ខ្លួនដដែល។ ដោយអស់ជម្រើស លោក Saha ក៏បានពិភាក្សាជាមួយក្រុមគ្រួសាររបស់លោកឱ្យរៀបចំមង្គលការឱ្យប្រពន្ធខ្លួនតែម្ដង។ ថ្លែងប្រាប់សារព័ត៌មានទាំងចិត្តត្រជាក់ លោក Saha បានរៀបរាប់ថា៖ «ខ្ញុំអត់មានបញ្ហាអីទេ។ បើសិនជាពួកគេចង់ គឺឱ្យពួកគេរួមរស់ជាមួយគ្នាឱ្យមានក្ដីសុខចុះ»។

តាមការបញ្ជាក់ពីខាងប៉ូលិសបានឱ្យដឹងដែរថា ពួកគេគឺមិនអាចចាត់វិធានការតាមច្បាប់អ្វីកើតឡើយ ព្រោះថាពិធីមង្គលការនោះគឺរៀបចំឡើងនៅវិហារ ហើយភាគីទាំងអស់គឺបានព្រមព្រៀងគ្នាថែមទៀត៕