នៅថ្ងៃទី ០៩ ខែមិថុនា ឆ្នាំ ២០២៥ នេះ សារព័ត៌មាន Page Six បានចេញផ្សាយពីតារាចម្រៀង Justin Bieber ដែលថ្មីៗនេះកាន់តែបង្ហាញពីភាពមិនប្រក្រតីផ្នែកផ្លូវអារម្មណ៍ បណ្ដាលឱ្យអ្នកគាំទ្រជាច្រើនមានការបារម្ភជាខ្លាំង។ ជាក់ស្ដែង កាលពីថ្ងៃទី ០៨ ខែមិថុនា ឆ្នាំ ២០២៥ កន្លងទៅ Justin Bieber បានបង្ហោះរូបជាថ្មីដែលហាក់ដូចបង្ហាញដំរួយថាលោកកំពុងស្ថិតក្នុងទំនាក់ទំនងដ៏ toxic មួយ។ ការបង្ហោះនោះដែរគឺជារូប selfie ចំនួន ២ សន្លឹកដែលមានពណ៌ខ្មៅព្រាលៗ អមដោយពាក្យពេចន៍ខាងក្រោមថា៖ «ហត់នឿយនឹងទំនាក់ទំនងបែបទិញ-ដូរ។ ប្រសិនបើខ្ញុំត្រូវធ្វើអ្វីមួយទើបទទួលបានការស្រឡាញ់ នោះវាមិនមែនជាការស្រឡាញ់ពិតប្រាកដនោះឡើយ»។
ការបង្ហោះនេះដែរបានធ្វើឱ្យមហាជនអ្នកគាំទ្រមានការបារម្ភខ្លាំង ដោយពួកគេជឿថា Justin កំពុងតែបង្ហាញពីការសុំជំនួយ។ វាមើលទៅដូចមាននរណាម្នាក់ទាញផលប្រយោជន៍ពីលោក បោកប្រាស់ទំនុកចិត្តលោក ហើយលោកកំពុងតែឈឺចាប់ខ្លាំងពេលរកឃើញថាមនុស្សនោះមិនស្មោះត្រង់នឹងលោក។ បន្ថែមពីនេះ មហាជនក៏រកឃើញទៀតថា Justin Bieber បានធ្វើការបង្ហោះរូបលើ IG ទាំងយប់ទាំងថ្ងៃឥតសម្រាកឡើយមួយរយៈថ្មីៗនេះ បើទោះជាមានមហាជនណែនាំឱ្យលោកសម្រាកចាកឆ្ងាយពីបណ្ដាញសង្គមក៏ដោយ។
គួរឱ្យដឹងថា នៅមួយថ្ងៃមុន Justin Bieber ក៏បានធ្វើការបង្ហោះរូបភាព selfies មួយចំនួនផងដែរ ដែលជារូបលោកបញ្ចេញទឹកមុខប្លែកៗដាក់មុខកញ្ចក់។ រូបភាពដែលបង្ហាញឱ្យឃើញពីស្ថានភាពមិននឹងនររបស់លោកនេះហើយបានធ្វើឱ្យគ្រប់គ្នាសង្ស័យថា លោកកំពុងតែញៀនថ្នាំខ្លាំងរហូតលែងមានសតិប្រុងប្រយ័ត្នគិតគូរ។
ស្ថានភាពបែបនេះហើយ គឺធ្វើឱ្យអ្នកគាំទ្រជាច្រើនប្រកាសសុំឱ្យក្រុមគ្រួសារ និង មិត្តភក្តិរបស់លោកជួយលោកផង ព្រោះពួកគេជឿថា Justin កំពុងតែមានបញ្ហាប្រឈមមុខនឹងផ្លូវចិត្តខ្លាំងតែម្នាក់ឯង ខួរក្បាលប្រមូលផ្ដុំទៅដោយរឿងអវិជ្ជមានប្រៀបដូចជាតារាចម្រៀង Liam Payne ឬ Britney Spears។ ដូច្នេះហើយ Justin គឺកំពុងត្រូវការការជួយបន្ទាន់តាមដែលអាចធ្វើបានមុនពេលគ្រប់យ៉ាងយឺតពេលអស់៕
